Tourism Corporation Bonaire (TCB) a anunsiá su
sifranan preliminar pa luna di yüli 2024, for di kua ta resultá ku den e luna ei Boneiru a
yama bon biní na 14.320 bishitante stayover. Esaki ta un oumento di 1,5% kompará ku
luna di yüli 2023, kaminda nos isla a yama bon biní na 14.109 bishitante stayover i kompará
ku e prestashonnan di promé ku e pandemia, kaminda a yama bon biní na 13.100
bishitante stayover.
E bishitantenan hulandes a keda e grupo di mas grandi, ku 7292 bishitante (50,9%), siguí
pa e merikanonan ku 2996 bishitante (20,9%). For di Kòrsou 2052 bishitante a bini nos
isla (14,3%), pero Aruba, Alemania, Bélgika, Brasil i Colombia tambe a duna un aporte
signifikante.
E bishitantenan merikano a bini prinsipalmente for di Florida, Texas, Georgia, California,
Colorado, Pennsylvania, New York i otro estadonan grandi. E gruponan di edat ku e
representashon mas grandi tabata esun di 45 pa 54 aña (20,4%) i esun di 55 pa 64 aña,
loke ta un indikashon di un interes fuerte serka biaheronan di edat mas haltu. E
bishitantenan hulandes a bini prinsipalmente for di Noord-Holland, Zuid-Holland i Noord-
Brabant, kaminda e gruponan di edat di 45 pa 54 aña (20,8%) i di 18 pa 24 aña (16,9%) a
dominá.
