Yamando bon biní na 169.706 bishitante stayover entre yanüari i desèmber 2023, Boneiru a surpasá e sifranan di aña 2019, 2021 i 2022. E logro históriko akí ta representá un kresementu di 8%, kompará ku e sifranan di promé ku e pandemia na aña 2019.
En total Boneiru a yama bon biní na 169.706 bishitante stayover na aña 2023, i ku esaki a surpasá aña 2019 (157.000) i aña 2022 (169.200). TCB su indikadó krítiko di prestashon (KPI), basá riba e STMP di aña 2017, tabata pa alkansá un total di 170.000 bishitante pa aña 2023. Esaki ta e di tres aña konsekutivo di kresementu riba base anual di nos isla, i ta surpasá tur e añanan anterior. For di aña 2024 TCB ta kompará e kantidat di bishitante stayover ku ta yega nos isla ku aña 2023.
Bishitantenan hulandes a representá 47% di e total, siguí pa bishitantenan for di Merka (23%), for di Kòrsou (14%), for di Alemania (2,1%), for di Aruba (2%), for di Canada (2%), for di Bélgika (1%) i for di Suisa (1%).
Luna di mart 2023 a konosé e kantidat mas haltu di bishitante, ku un total di 16.493, miéntras luna di yanüari 2023 a registrá e durashon promedio di estadia mas largu, ku bishitantenan ku a keda en total 195.294 anochi na nos isla. En total bishitantenan a keda aproksimadamente 1.674.163 anochi na Boneiru, un promedio di 9,8 anochi pa kada estadia.
Bishitantenan ku ta bolbe bèk a hunga un ròl importante den Boneiru su éksito turístiko na aña 2023. Mas òf ménos 56,5% di e bishitantenan a bishitá nos isla anteriormente kaba, miéntras 43,5% a bini pa promé biaha. Na luna di desèmber bishitantenan ku ta bolbe bèk a representá no ménos ku 60% di e kantidat total di bishitante.
E meta mas komun pa e wéspetnan bishitá Boneiru tabata vakansi, kaminda 52% a indiká esaki komo motibu prinsipal. Sambuyamentu ta sigui ku 13,6%, miéntras biahe di negoshi i bishita na amigu i famia kada un a representá 8%.
Bishitantenan hulandes fuertemente a duna preferensia na vakansi, kaminda 67% a indiká esaki komo nan meta prinsipal. Nan durashon promedio di estadia tabata 11,9 anochi. E bishitantenan hulandes a bini prinsipalmente for di Noord-Holland, Zuid-Holland i Noord-Brabant, kaminda e datonan demográfiko di edat ta mustra 20,5% entre 55 pa 54 aña, 20% entre 45 pa 54 aña i 17% entre 25 pa 34 aña.
Bishitantenan merikano tabata repartí den un forma mas balansá entre sambuyamentu (43%) i vakansi (42,5%), ku un durashon promedio di estadia mas kòrtiku di 8,4%. E bishitantenan merikano a bini prinsipalmente for di Florida, Texas, California, New York i Colorado. Nan datonan demográfiko di edat a mustra un presensia signifikante di biaheronan di edat mediano i edat mas haltu, kaminda 24% tabatin entre 55 i 64 aña, 20% tabata mas grandi ku 65 aña i 20% tabatin entre 45 i 54 aña.
Por lo general e bishitantenan for di Kòrsou a keda un periodo mas kòrtiku, ku un durashon promedio di estadia di 4,5 anochi. Nan meta mas prinsipal pa bishita tabata hasi negoshi (29%), vakansi (22%) i bishitá amigu i famia (14%).
Pa loke ta trata preferensia pa akomodashon, 56% di e bishitantenan a skohe pa hotèl òf risòrt, 21% a skohe pa apartamentu, 11% a skohe pa vila i 6% a keda serka amigu òf famia.
TCB a tene enkuesta ‘exit’ pa midi satisfakshon di turista i e resultadonan a mustra reakshonnan positivo. Bishitantenan mui probablemente lo rekomendá Boneiru (93%), nan a kalifiká nan estadia general ku un ekselente 92 for di 100 i nan a indiká ku probablemente nan lo bolbe bishitá nos isla (91%).
Miles Mercera, direktor di TCB, a ekspresá su mes ku hopi entusiasmo: “E kresementu remarkabel di turismo na Boneiru na aña 2023 ta un prueba di resiliensia di nos destinashon i sosten insesante di nos bishitantenan i nos komunidat lokal. Sinseramente nos ta gradisí tur hende ku a kontribuí na éksito di Boneiru su sektor turístiko pa medio di kolaborashon, pashon i dedikashon. Huntu nos ta hasi Boneiru un destinashon di biahe sostenibel, ku ta brinda eksperensianan inolvidabel, úniko i outéntiko i hospitalidat eksepshonal.”
Pa estadístika i informashon mas detayá tokante Boneiru su prestashonnan turístiko bo por bishitá nos wèpsait ofisial riba www.bonaireisland.com òf bo por tuma kontakto ku nos via email riba info@bonaireisland.com.
