OUMENTO DI 23% DI YEGADA DI TURISTA NA LUNA DI DESÈMBER 2022 KOMPARÁ KU E YEGADANAN DI PROMÉ KU E PANDEMIA NA LUNA DI DESÈMBER 2019
Un oumento di mas òf ménos 67% kompará ku luna pasá.
Prestashon turístiko mensual di Boneiru – Resultado preliminar.
Tourism Corporation Bonaire ta partisipá ku na luna di
desèmber 2022 tabatin en total 17.162 wéspet ‘stayover’. Esaki ta un oumento di mas ku 23% kompará ku e 14.000 bishitante ‘stayover’ ku nan a registrá promé ku e pandemia na luna di desèmber 2019. E merkado oropeo tabatin un porsentahe mas grandi di bishitante ku kualke otro merkado registrá. Boneiru a mira un desaroyo positivo for di e dos merkadonan mas importante. Tabatin en total 5583 bishitante for di Merka (33%) i 7319 turista for di Hulanda (43%). Nos isla besiña Kòrsou a hunga un ròl importante ku binida di en total 1694 bishitante pa Boneiru, loke ta enserá 10% di tur yegada.
Kompará ku luna pasá, novèmber 2022, algun merkado sekundario, entre otro Aruba, Canada, Alemania, Reino Uní, Bélgika, Colombia i Suisa, a mantené e mesun nivel di partisipashon den merkado.
Diariamente TCB ta monitoreá e prestashonnan turístiko i ta kompará su KPI-nan (indikadornan krítiko di prestashon) ku e nivelnan pre-pandémiko di e prestashonnan den region. Aña 2019 tabata un di e añanan ku Boneiru a presta mas mihó i aktualmente TCB ta us’é komo standarte pa midi rekuperashon di turismo na nos isla.
Mas aleu e durashon promedio di estadia na Boneiru pa bishitantenan for di Merka tabata 7 anochi, miéntras ku bishitantenan for di Hulanda a keda un promedio di 14 anochi na nos isla. Banda di esaki mayoria hende ku ta bini nos isla ta personanan adulto di entre 45 i 65 aña.
Na luna di novèmber 2022 en total 25 barku krusero a bishitá Boneiru i huntu nan tabatin 53.054 pasahero na bordo.
Riba e wèpsait www.bonaire.portcall.com bo ta haña e informashon di mas aktual tokante e próksimo temporada krusero.
Pa informashon adishonal i estadístika bo por akudí riba www.bonaireisland.com òf bo por manda un email pa info@bonaireisland.com