Boneiru a bria durante DEMA Show 2023

15 partner a eksponé den e Pavilion Boneiru nobo estilo ‘It’s in our Nature’

E aña akí Crystel Pourier, US & Canada Representative, i Annette Emerenciana, Marketing PR & Projectcoördinator, a representá Tourism Corporation Bonaire (TCB) for di 14 te ku 17 di novèmber 2023 durante e di 47 DEMA Show anual na New Orleans, Louisiana. 

Komersiantenan por mayor, ‘influencers’ i spesialmente sambuyadónan i amantenan di buseo a bishitá e evento ku a dura kuater dia. Hendenan ku ya kaba a yega di bishitá Boneiru i otronan interesá a aserká e Pavilion Boneiru pa sera konosí ku nos isla òf pa papia tokante nan bishita i plania esaki. E aña akí e Pavilion Boneiru a konsistí di e siguiente partnernan: Belnem House Bonaire, Bonaire East Coast Diving, Buddy Dive Resort, Captain Don’s Habitat, Chogogo Beach & Dive Resort, Courtyard by Marriott, Delfins Beach Resort, Dive Friends Bonaire, Divi Flamingo Beach Resort, Grand Windsock Bonaire, Plaza Beach & Dive Resort, Resort Bonaire, STINAPA, VIP Diving i Tourism Corporation Bonaire.

E ‘look & feel’ nobo di e Pavilion Boneiru estilo It’s in our Nature a hala atenshon di tur hende ku tabata kana pasa den e hanchi i nan tabata duna kòmplimènt relashoná ku e uniformidat den e pavilion. E pavilion tabatin un ‘big top banner’ ku meimei di esaki e logo di Boneiru, un imágen di bou di awa na un banda i un di e atrakshonnan úniko di Boneiru, e saliñanan di salu, na e otro banda. Mayoria di e partnernan tabatin un bèkgrount ku lus kaminda por a mira nan produkto. Esakinan tur tabata diseñá den ‘branding’ boneriano i nan tur tabatin e mesun bali  ku vários bunita imágen riba dje. 

Pa di tres aña konsekutivo TCB a traha huntu ku ScubaRadio pa e akshonnan di regalo. Tur dia promé ku e show kuminsá, via diferente wega e bishitantenan por a gana vários premio di Boneiru. E ganadónan tabata kontentu ku e premionan ku nan a gana i nan ta anhelá pa bishitá nos isla. E premionan tabata opsekio di Belnem House Bonaire, Captain Don’s Habitat, Chogogo Beach & Dive Resort, Courtyard by Marriott, Delfins Beach Resort, Dive Friends Bonaire, Divi Flamingo Beach Resort, Grand Windsock Bonaire, Plaza Beach & Dive Resort i VIP Diving.

E DEMA Show 2024 ta tuma lugá for di 19 te ku 22 di november na Las Vegas, Nevada. Si bo ta interesá pa otro aña partisipá na e show, e ora ei manda un email na 

crystel.pourier@bonaireisland.com.