Dos persona enkontrá morto na dos adrès
Riba djabièrnè 3 di mei, despues di 6 or di atardi, 'meldkamer' sentral a risibí dos diferente
notifikashon ku a enkontrá dos persona ku no ta duna señal di bida na dos diferente adrès. Polis i
departamento forénsiko di KPCN a bai na ámbos sitio.
A enkontrá e promé kurpa sin bida den un kas na Kaya Tonkawa na nort’i Saliña. Despues di
investigashon, dòkter a konstatá morto di un hende hòmber di inisial F.B.M di 64 aña di edat, nasé
riba 4 di desèmber 1959 na Boneiru.
E di dos kurpa sin bida ku a enkontrá tabata den un kas na Kaya Neerlandia. Na promé instante, polis
no por a drenta den e kas i mester a kibra e porta di dilanti pa por yega na e kurpa. Despues di
investigashon, dòkter a konstatá morto di un hende hòmber di inisial R.J.V. di 59 aña di edat, nasé
riba 6 di mei 1964 na Hulanda.
Pikòp na kandela
Riba djabièrnè 3 di mei, alrededor di 2.25 or di mardugá, ‘meldkamer’ sentral a risibí notifikashon di
un pikòp ku tabata na kandela dilanti di un kas riba Kaminda Djabou. Na momentu ku e patruya a
yega, esnan presente a paga e kandela kaba ku un slan di kurá. Esnan presente a deklará ku nan a
tende un zonido duru i a mira ku e pikòp menshoná tabata na kandela. Brantwer a bini tòg na e sitio
pa kontrolá ku e kandela tabata bon pagá. No tabatin herido. Brantwer i e departamentu forénsiko
di KPCN a hasi un investigashon pa sa kousa di e kandela. A pega e vehíkulo probablemente
intenshonalmente na kandela i a konfiská esaki pa investigashon mas aleu.
Polis ta pidi kualkier persona ku por a mira algu, a tende algu òf tin informashon relevante pa e
investigashon, pa tuma kontakto ku polis na 715-8000 òf via di e liña di tep anónimo 9310.
Detenshon despues di aksidente ku herido
Riba djaweps 2 di mei, alrededor di 7 or di anochi, un aksidente a tuma lugá na e krusada ku ta
konektá Hanchi Amboina i Kaya Papa Cornes. Shofùr di un pikòp a dal un siklista. Pa e motibu aki e
siklista a risibí fraktura serio na su pianan.
Konforme e prosedura 'botsen is blazen' a hasi un tèst di supla ku e shofùr di e pikòp i a resultá ku e shofùr tabata bou di influensia di alkohòl. Investigashon mas aleu a mustra ku e shofùr a konsumí
mas ku 3 biaha di e kantidat di alkohòl ku ta permití. A detené e hòmber di inisial R.R.D. di 62 aña di edat pa manehá bou di influensia di alkohòl. A sera e sospechoso preventivo ku un máksimo di 2 dia
(ku posibilidat di prolongashon) pendiente investigashon. A konfiská reibeweis di e sospechoso.
Kuerpo Polisial Hulanda Karibense ta atvertí un i tur ku ta partisipá den tráfiko pa tene nan mes na e
reglanan di tráfiko pa seguridat di bo mes i otronan.
Aksidente Kaya Neerlandia
Riba djaweps 2 di mei, alrededor di 12.05 or di mèrdia, ‘meldkamer’ sentral a risibí notifikashon
tokante un aksidente entre un outo i un skuter riba Kaya Neerlandia. E shofùr di e outo a deklará ku
e kier a lora na e pòmp di gasoline i na e momentu ei un skuter ku tabata bini for di direkshon
kontrali a dal den su outo. E shofùr di e skuter a resultá heridá i ambulans a transport’é pa hòspital
pa tratamentu médiko.
Kòntròl di velosidat Kaya Amsterdam
Durante oranan di mainta riba djaweps 2 di mei, Kuerpo Polisial Hulanda Karibense (KPCN) a tene un
kòntròl di tráfiko dirigí riba velosidat di vehíkulonan. E kòntròl di tráfiko a tuma lugá riba Kaya
Amsterdam. A midi velosidat di e vehíkulonan ku tabata aserkando ku un mididó di velosidat spesial
(lasergun).
Riba Kaya Amsterdam e velosidat máksimo ku ta permití ta 40 km pa ora. Durante e kòntròl a midi
velosidat di un total di 15 vehíkulo i a duna 4 shofùr un but pa surpasá e velosidat máksimo ku ta
permití. E velosidat ku a midi tabata entre 50 pa 65 km pa ora.
KPCN ta atvertí tur outomobilista pa paga tinu riba nan velosidat. Den área urbanisá (bebouwde
kom), 40 km pa ora ta e velosidat máksimo i pafó di bebouwde kom ta 60 km pa ora.
Ladronisia for di den kurá
Riba djaweps 2 di mei a drenta keho di ladronisia di un generator koló hel ku pretu i ámbos lus di
patras di un pikòp di e marka Toyota modelo Hilux for di den kurá di un kunuku situá na Bario
Mexico. Deskonosínan a bai ku esakinan. Ta investigando e kaso.
Detenshon pa violashon di Lei di Identifikashon
Riba djárason 1 di mei, alrededor di 5.45 or di mardugá, a detené un hòmber di inisial J.S.L. di 26 aña
di edat riba Bulevar Julio A. Abraham pa violashon di Lei di Identifikashon BES. A topa ku e
sospechoso, ku tabata kuadra ku e deskripshon, den un pikòp despues ku ‘meldkamer’ a haña
notifikashon di un intento di kiebro na un akomodashon turístiko riba e kaya menshoná. E
sospechoso no por a identifiká su mes na promé instante. Ademas e sospechoso a gaña e agentenan
polisial diferente biaha i no tabatin motibunan bálido pa tabata den serkania di e akomodashon
turístiko den e oranan ei. Ta investigando e kaso.
Detenshonnan pa manehá bou di influensia
Riba djárason 1 di mei, alrededor di 2.50 or di mardugá, ‘meldkamer’ sentral a risibí notifikashon
tokante un aksidente riba Kaminda Gurubu. Pa motibunan te ainda deskonosí, un outo a drenta
mondi. Ambulans a transportá e víktima pa hòspital pa tratamentu médiko. Debí na e aksidente, a
sera e kaya parsialmente pa e servisionan konserní por a hasi nan trabou. Miéntras ku e agentenan
tabata dirigí tráfiko, a para shofùr di un motosaikel pa motibu ku e no por a sigui kore dor di e
aksidente menshoná. E shofùr di e motosaikel tabata mustra vários karakterístika di un persona ku
ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku
ta permití. A detené e hòmber di inisial S.D.W. di 39 aña di edat i a hib’é warda di polis pa un análisis
di rosea. Debí na e resultado di esaki, a konfiská su reibeweis. Den oranan di mardugá riba djárason 1 di mei, alrededor di 1.40 or di mardugá, a detené un hòmber
di inisial J.A.P.M. di 23 aña di edat riba Kaya Neerlandia pa manehá bou di influensia di alkohòl. E
sospechoso tabata enbolbí den un aksidente entre dos outo riba Kaya Amsterdam i despues el a
sigui kore bai. Despues ku ‘meldkamer’ sentral a risibí notifikashon tokante di esaki, un patruya a
mira e outo ku tabata kuadra ku deskripshon riba bulevar Gobernador N. Debrot. E patruya a bai su
tras i a duna e shofùr señal pa para riba Kaya Neerlandia, di kual el a kumpli. Na momentu ku e
agentenan a aserká e shofùr, e tabata mustra vários karakterístika di un persona ku ta bou di
influensia di alkohòl i no por a mustra un reibeweis ni seguro bálido. A hasi un tèst di supla kuné i a
resultá ku el a konsumí mas alkohòl ku ta permití. A detené pa manehá bou di influensia di alkohòl i
a hib’é warda di polis pa un análisis di rosea. Debí na e resultado di esaki, a konfiská su reibeweis.
Diferente notifikashon pa asistensia durante Dia di Rincon
Kuerpo Polisial Hulanda Karibense(KPCN) ta wak bèk riba 30 di aprel, Dia di Rincon. E dia a kuminsá
ku un notifikashon alrededor di 5 or di mardugá di un outo di famia ku dos pasahero aden, ku a kore
drenta mondi. E aksidente a tuma lugá den bisendario di Sabana Piedra Krus. No tabatin herido. Pa
motibunan deskonosí, e shofùr di e outo a pèrdè kòntròl i drenta mondi. E por a mustra un reibeweis
bálido pero e no por a mustra un prueba di seguro bálido. A konsekuensia di esaki el a haña un but.
Banda di esaki tabatin diferente notifikashon mas tokante aksidentenan sin herido.
Den oranan di mainta polis a skual un mucha hòmber ménor di edat pa motibu ku el a kue pikòp di
su tata sin outorisashon i tabata fiver ku esaki riba Kaya Kòmkòmber. A atende serio ku e yu i e tata
riba esaki.
Durante e dia, ‘meldkamer’ sentral a risibí diferente notifikashon tokante molèster di stashoná.
Esnan ku a mèldu tabata blòkiá dor di otro vehíkulonan di manera ku nan no por a move for di e sitio
i tabatin tambe entrada i salida di kasnan den Rincon ku vehíkulonan a blòkia. Tambe a drenta
diferente notifikashon tokante personanan ku a bira malu durante di e dia. A konsekuensia di esaki a
dirigí ambulans. Polis a kita dos yabi di outo despues ku e shofùrnan bebí tabata ke drenta outo pa
manehá. A informánan bon klá ku nan por pasa tuma e yabinan bèk ora ku nan ta ‘nuchter’.
Den oranan di anochi tabatin diferente bringamentu entre presentenan i entre gruponan. Durante e
bringamentunan aki a tira ku bòter di glas tambe, ounke polis a pone enfásis riba kon importante ta
pa husa beker òf kùp (re-usabel) na lugá di bòter di glas pa evitá situashonnan peligroso. Alrededor
di 8.05 or di anochi a detené un hòmber di inisial J.G.A. di 19 aña di edat riba Kaya E.B. Sint Jago pa
violashon di e Lei di Identifikashon BES.
Alrededor di 10 or di anochi a detené un hòmber di inisial S.B.E.C. di 47 aña di edat riba Kaminda
Onima pa maltrato ku un arma i maltrato severo. E sospechoso tabata enbolbí den un bringamentu
riba Bulevar Miguel Pourier na Rincon i a hinka su víktima ku un opheto. Despues di e insidente, e
sospechoso a drenta outo i a bandoná e sitio den direkshon di Playa. Polis a bai su tras i a detené. Na
promé instante e sospechoso no a rekshoná riba e señal ku a dun’é pa para, pero kòrtiku despues a
logra para e sospechoso. Ambulans a hiba e víktima hòspital pa tratamentu médiko. Ta investigando
e kaso.
Aksidente entre outo i skuter
Riba djamars 30 di aprel, alrededor di 6.50 or di mainta, un aksidente entre un outo i un skuter a
tuma lugá riba Kaya International na altura di e rotònde. E outo a dal e skuter. E shofùr di e outo a
deklará ku e no a mira e skuter ètòl. E shofur di e skuter a haña raskunan i personal di ambulans a
dun’é tratamentu médiko na e sitio mes i e no mester a bai hòspital.
Dos detenshon pa ladronisia i enkubrimentu
Riba djaluna 29 di aprel, alrededor di 8.35 or di anochi, a detené un hòmber di inisial K.Q.D.A. di 20
aña di edat riba Kaya Sofaya i un hòmber di inisial R.S.D.W. di 19 aña di edat riba Kaya Taki. Ambos
detenshon ta den kuadro di un investigashon relashoná ku kasonan di ladronisia di último tempu di
vehíkulonan, entre otro E-bikes i skuter. Investigashon den e kaso ta kontinuá.
Dos aksidente na mesun momentu
Den oranan di atardi riba djaluna 29 di aprel, un aksidente entre un pikòp i un skuter a tuma lugá
riba Kaya Grandi. E pikòp a dal den e skuter pa motibu ku e shofùr di e pikòp no a wak e skuter.
Despues a drenta un di dos notifikashon di un aksidente na e mesun sitio. Un outo di famia a dal
patras di un skuter. No tabatin herido. Debí na e aksidentenan aki, a sera e kaya parsialmente pa e
servisionan konserní por a hasi nan trabou.
Aksidente ku skuter
Riba djaluna 29 di aprel, alrededor di 9.25 or di mainta, un aksidente a tuma lugá riba bulevar Julio A.
Abraham. Shofùr di un skuter a wanta brek muchu fuerte dilanti di un drèmpel despues di kua el a
pèrdè kòntròl i kai na suela. E víktima a haña raskunan i ambulans a transport’é pa hòspital pa
tratamentu médiko.
Ladronisia di skuter
Riba djasabra 27 di aprel a drenta keho di ladronisia di un hèlm di skuter koló pretu i un skuter di hür
koló shinishi kla di e marka Kymco, modelo Agility, ku plachi di number MF-21. E skuter tabata
stashoná dilanti di un kompleho di apartamento riba Kaya Papa Cornes. Entre 1.45 or di mardugá
riba djabièrnè 26 di aprel i 2.30 or di atardi riba djasabra 27 di aprel, un hòmber deskonosí a bai ku e
skuter i e hèlm. Ta investigando e kaso.