Señor Presidente, komo miembro independiente di e kolegio aki, permití mi riba e fecha tan importante aki, pa enkurashá pueblo di Bonaire pa no laga problemanan ku nos tin aki na Bonaire, ku kual nos mester lucha tur dia di nobo, ta motibu pa nos keda sin rekonosé e grandesa di nos bunita isla i selebrá e dia di awe di forma digno i ku rèspèt.
No laga pa diferensia di opinion i/òf diferensia di ideologia pone ku nos NO ta komprometé nos mes pa halsa kalidat di bida na Bonaire. Apesar di problemanan ku nos isla ta enfrentá, nos mester realisá, ku no ta tur kos ta pèrdí i si nos tin determinashon nos por duna e fecha di 6 di sèptèmber un balor muchu mas grandi. Nos ta un nashon bendishoná i nos ta dispone di hopi rikesa natural ku por en-grandese nos Dushi Bonaire.
Pa asina nos krea un Bonaire, próspero i resiliente. Esaki den tur sentido di palabra.
Awe 6 di sèptèmber, ta un fecha importante pa nos tur ku a nase aki i ami Deisy Coffie, miembro di e kolegio aki ta para pa trese un kambio den e forma tradishonal di hasi polítika i mi ta kla pa traha riba un struktura pa adelanto di mi Bonaire.
Un polítika kaminda nos;
- Ta ban kombiná eksperensia ku hubentut
- Un maneho sin prehuisio i kaminda NO ta ekskluí ningun gremio
- Kaminda nos ta skucha pueblo, pa konosé e nesesidat di kada sektor
- Un polítika di inklushon
- Nos lo tradusí tur loke nos skucha, den maneho ku mester wòrdu hiba pa krea un Bonaire próspero
Señor Presidente, esaki ta e úniko forma pa nos por krea un Bonaire, kaminda nos tur ta sinti ku nos ta parti di gobernashon i tambe ku nos ta sinti e sentido di patriotismo i ku nos ta parti di gobernashon.
Señor Presidente nos Himno i Bandera ta e símbolonan mas prinsipal di un pais. Pero konstrukshon di e patria ku e Himno i bandera aki ta simbolisá, ta trabou di nos tur komo siudadano Boneriano, esaki ta un proseso kontinuá di generashon pa generashon.
E identidat i patriotismo di kada yu di e tera, mester wòrdu funda riba prinsipio i balornan ku ta propio, esta di NOS. Pero mas importante e prinsipio i balornan aki mester tene kuenta ku nos kultura i historia.
Apesar di e tempu ku a transkurí señor Presidente i e kambionan profundo den Bonaire su struktura estatal, nos kultura, nos historia, nos balor i prinsipionan no por bai pèrdí, nan mester keda vigente i nos mester lucha pa nunka nos no pèrdè nan.
Komo sernan humano i bon Boneriano ku nos ta, nos mester sigui den lucha pa mantené nos mes identidat i partisipá aktivamente den diskushonnan nashonal, ku ta di interes general pa sobrebibensia di nos Dushi Bonaire. Señor Presidente, nos mester traha riba konstrukshon di un sosiedat mas hustu, mas ekitativo i mas solidario.
Nos kier konstruí un Bonaire próspero i ku bienestar pa nos tur, pero si abo pueblo no duna di bo parti, e kaminda lo bira mas largu i mas difísil.
Ban enfrentá e retonan huntu i ban konstruí un futuro pa nos yunan, nos por i huntu nos lo logra esaki.
E polítika nobo ku lo mi bai hiba, ta unu kaminda nos ta rekonosé tambe desishon nan ku ta na benefisio di pueblo di Bonaire. Ta p’esei nos ta kontentu ku e aña aki pa selebrashon di e fecha tan importante aki, a skohe nos yunan komo e tema sentral pa e selebrashon.
Nos muchanan, nos tesoro, nos futuro, nos orguyo.
Ta momentu pa di bèrdat nos ban traha riba un Bonaire kaminda nos hóbennan ta bai hunga un ròl mas prominente den gobernashon i funshonnan di liderazgo. Ta tarea di nos ku ta dispone di eksperensia, pa duna nan e guia nesesario, pa no solamente nan ta e generashon ku lo tuma over, pero ku nos lo sa di traspasá e konosementu pa nan pa asina nan por hasi e trabou di un forma digno i pa adelanto di Bonaire.
Presidente, un pais chikitu manera Bonaire ku hopi potensial i kaminda diferente kultura a meskla i uni den un mosaiko kultural riku, kolorido i diverso, ta na nos komo mandatario pa huntu ku nos hóben nan desaroyá tur nos potensialnan, pa asina nos posishoná Bonaire na un posishon privilegiá den área di Caribe
NO mester desaroyá siudadanonan aktivo i asertivo, ku a lo largu lo kontribuí na formashon di famianan fuerte, responsabel, konsiente i kapas di kontribuí na e desaroyo máksimo di nos pais. Ta di vital importansia pa fortifiká e balor propio i e balor humano di henter nos komunidat.
Maske nos bandera no por papia ku nos, e ta kòrda nos e pasado ku nos a biba aden, e ta rekordá nos di e hòmber i muhénan ku a bai nos dilanti i ku a pone e fundeshi pa nos sigui konstruí riba dje.
Nos himno su letranan, ta lanta den nos e sentido di patriotismo i ta laga nos sinti nos mes digno di ta un Boneriano, ku tur dia di nobo kier mira desaroyo na nos Dushi Bonaire.
Nos ta riba kaminda pa logra tur esaki nan, ku un polítika di inklushon, kaminda nos no mira ni rasa, ni religion, ni kolo di kueru.
Pero nos tin bista solamente pa sigui ta fiel na nos Himno i Bandera, pa semper nan ta parti di nos adelanto i konstruyendo e Bonaire ku nos tur ta anhelá.
