Bonaire International Airport N.V. (BIA) ta bai renobá próksimo aña, huntu ku ministerio di Infrastruktura i Maneho di awa (IenW), e asina yamá instalashon di Airfield Ground Lighting (AGL) di Aeropuerto Flamingo. Esaki ta nesesario pa keda kumpli ku eksigensianan di International Civil Aviation Organization pa aviashon sivil. E instalashon di AGL ta un elemento importante pa garantisá aviashon sigur. IenW i BIA pa e motibu ei a hasi palabrashonnan anteriormente tokante finansiamentu i ehekushon. Rijkswaterstaat, ku su ekspertisia komo servisio ehekutivo di IenW, ta pèrkurá pa maneho di e proyekto. Ku firmamentu di e kontrato ku SPIE Nederland, un suministradó internashonal di sistemanan tékniko kompliká, a dal ayera un paso importante. Despues un prosedura di destaho bon prepará, nan lo bai ehekutá e trabounan riba enkargo di Rijkswaterstaat. Riba aeropuerto di Boneiru ta baha i subi diariamente desena di buelo pa i for di Hulanda, Merka, Canada i un kantidat di destinashon manera naturalmente Kòrsou i Aruba. Ku 424.000 pasahero den 2022, Aeropuerto Flamingo ta e di 4 aeropuerto di Hulanda i e ta un di e dos aeropuertonan hulandes ku diariamente ta risibí avionnan wide-body pa tráfiko interkontinental. E aeropuerto ta operá bou di supervishon di Inspectie Leefomgeving en Transport (ILT) di Hulanda i un bon sistema di iluminashon di pista p’esei ta di sumo importansia pa un operashon sigur.
E instalashon di AGL ta konsistí di iluminashon di pista, iluminashon pa aproksimashon, kabel, pos, suministro (di emergensia) di koriente i sistemanan operashonal. E aktual instalashon ta yega final di su eksitensia den algun tempu. En total lo instalá algun sentenar di lus LED i asesorio duradero, lo pone desena di pos i lo pasa kasi 100 kilometer di kabel. BIA i IenW konhuntamente ta karga e invershon den e sistema nobo. Onno de Jong, Chief Operating Officer na BIA: “Mi ta kontentu ku despues di dos aña di preparashon intensivo a logra e echo importante aki ku éksito. Asin’aki aeropuerto Flamingo den futuro tambe ta sigurá di un sistema di iluminashon di pista konfiabel i sigur.”
Segun espektativa remplaso di e instalashon di AGL lo kuminsá den e promé mitar di 2024. E trabounan lo tuma lugá partikularmente den oranan di anochi, di manera ku aeropuerto por keda habrí normal, pa buelonan di ambulans tambe. Ta harma e sistema nobo banda di e sistema eksistente i ta te ora tur kos ta kla, ta bai over riba e sistema nobo.
“Nos ta sumamente kontentu ku e bon kooperashon ku ministerio i Rijkswaterstaat. Ku firmamentu di e kontrato akí no a haña den SPIE un suministradó konfiabel ku lo bai ehekutá e proyekto akí próksimo aña. Ku e esfuerso komun akí nos ta garantisá ku Boneiru, den futuro tambe, ta alkansabel di manera sigur”, Maarten van der Scheer, direktor di BIA ta bisa.
