Ekselensia,
Nos, Bonaire Human Rights Organization (BHRO) i Fundashon Nos Kier Boneiru Bèk (NKBB), ta skirbi na bo(so) relashoná ku e bishita ariba menshoná di Rei Willem Alexander di Hulanda, ku den su delegashon, lidernan demokrátikamente elegí di Kòrsou Aruba i Sint Maarten, e islanan semi-outónomo den Reino Hulandes. Den su delegashon, e gezaghebber di Boneiru, Sr. Edison Rijna tambe tabata presente i a bisa ku e ta representá e isla di Boneiru. Esaki ta un otro intento di purba manipulá Nashonnan Uní tokante Boneiru, pasobra e isla di Boneiru, no tin un lider demokrátikamente elegí. E gezaghebber ta representá Rei i e gobièrnu hulandes. Ta Rei ta nombr’é. E pueblo di Boneiru no tin arte ni parte den e nombramentu akí.
Inmediatamente despues ku e Rei Hulandes hipókrita akí a dirigí e Konferensia tokante Awa na Nashonnan Uni, Hulanda ta apuntá gezaghebber Rijna, ku tin un historia notorio di vínkulo ku korupshon i aktonan kriminal i ta bou di investigashon di e Ekipo di Kolaborashon di Investigashon (RST) di Hulanda i tambe Ministerio Públiko. E nombramentu sumamente remarkabel akí di Sr. Rijna – komo un diplomátiko tòp ku posishon na Nashonnan Uníkomo “enviado spesial” na nòmber di Hulanda Karibense pa fondonan di Union Oropeo i Nashonnan Uní i pa relashonnan ekonómiko ku Latino Amérika, pa mantené kontakto ku e region i tambe ku organisashonnan ku tin relashon ku Nashonnan Uní i ku ta relevante pa Karibe Hulandes – aparentemente ta fòrsá bou di menasa di Gobièrnu Hulandes.
Esaki ta un akshon deliberá di Hulanda pa stroba e aktividatnan di BHRO i NKBB di e último dies lunanan den region di Karibe i Latino Amérika, mustrando, konsientisando i eksponiendo e evidente kontinuashon di kolonialismo Hulandes ku nos isla di Boneiru ta konfrontando, miéntras ku nos ta buskando pa pone Boneiru bèk riba e Lista di Teritorionan-Sin-Propio-Gobernashon di Nashonnan Uní.
E bishita di Rei Willem a tuma lugá na mes momentu ku e reunion dediká na Small Islands Developing States (SIDS), Estadonan Chikí Insular den Desaroyo, spesialmente den Karibe, ku ta enfrentá vulnerabilidatnan sosial, ekonómiko i ambiental úniko. E Rei hulandes a subi riba esenario komo organisadó i a eksponé e engaño kruel, e realidat flagrante di e kontinuo kolonisashon di e islanan di Karibe hulandes. E nostalgia inhumano di kolonialismo sin niun kontrol ku t’ei ketu bai den Karibe apesar ku e mesun Nashonnan Uní a deklará kolonialismo komo Krímen Kontra Humanidat.
E Rei hulandes a trese huntu kuné na e esenario mundial di Nashonnan Uní, su lidernan supordiná dje islanan Karibense, ku te awe ta permanesé bou di dominio kolonial di e gobièrnu ku base na Den Haag. E Rei mas o ménos a atmití na e realidat di kolonialismo akí, ora ku e la bisa: “ (…) Inkluso nos ta representá e Estadonan Chikí Insular den Desaroyo, pasobra parti di Reino ta situá den Karibe, I ta konsistí di Aruba, Kòrsou i Sint Maarten (islanan CASt). Meskos ta e islanan Boneiru, Saba i Sint Eustatius (islanan BES)”. Loke ku mundu i Nashonnan Uní no sa, ta ku gobièrnunan di e islanan hulandes den Karibe, ku e Rei i hulandesnan a presentá einan riba esenario, no ta kumpli ku e mínimo standart rekerí pa lei internashonal i Nashonnan Uni di propio-gobernashon. E gobièrnu Hulandes den nòmber di Rei ta poseé hopi instrumento no-demokrátiko i poder pa krea lei i proseduranan ku unilateralmente ta anulá tur e gobièrnunan supordiná di e islanan Karibense.
Na momentu ku a desmantelá Antia Hulandes, na 2010, gobièrnu hulandes a aneksá e islanan di Boneiru, Saba i Sint Eustatius (BES) ilegalmente den un akshon no-demokrátiko i unilateral. Konsekuentemente na 2017 a integrá i inkorporá e pueblonan dje islanan BES ku mesun nashonalidat i pasaporte hulandes den Konstitushon Hulandes sin derechonan igual ku e hulandes ku ta biba na Hulanda oropeo, komo siudadanonan di di dos rango i kontra di deseo i desishon demokrátikamente ekspresá di e pueblonan. Nos no mester yama esaki un forma nobo di Apartheid hulandes den Karibe?
15 di mart 2023 – Elekshonnan pa Konseho Insular i Kolegio Elektoral na Boneiru
BHRO I NKBB a hasi yamada na e pueblo di Boneiru pa no vota komo protesta, pasobra no vota ta e úniko manera pa resistí kontra un sistema ku ta un farsa, ta ilegítimo i outoritario. Apesar di un kampaña basta grandi, dirigí pa Hulanda, pa bai vota, den diferente idioma, kasi 50 porshento di e poblashon lokal no a bai vota, kompará ku promé ku e aneksashon ilegal na 2010 kaminda e partisipashon tabata riba 80 porshento. E akshon di protesta di no vota a mustra un biaha mas e pueblo boneriano su malkontentu ku e demokrasia falsu i elekshon falsu, kaminda nan lidernan elegí no ta poseé poder, pasobra ta Den Haag, esta gobièrnu hulandes ta disidí. I e elekshonnan akí a tuma lugá poko dia promé ku e Rei su bishita na Nashonnan Uní.
Un pregunta ku niun di e lidernan karibense, apuntá pa Hulanda i ku Hulanda a trese pa bin papia na Nashonnan Uní, lo hasi na niun nivel, ta: na unda e representante di Sint Eustatius a keda? Den Haag a saka e gobièrnu lokal elegí dirigí pa Clyde van Putten ku forsa for di ofisina na febrüari 2018 i a apuntá un gobernante kolonial pa goberná Sint Eustatius. Anto te dia di awe, despues di mas ku 5 aña, e situashon a keda meskos i niun hende, niun lider di Karibe hulandes por hasi i niun ta hasiendo nada riba e krímen kontra humanidat akí, ku ta un bèrgwensa pa dignidat di e pueblo karibense.
Nos ta bolbe manda un atvertensia urgente pa CARICOM i liderazgo karibense. Di bèrdat ta asuntu di awa, manera e Rei i su sekuasnan karibense a menshoná riba e esenario na Nashonnan Uní? Na 2010, ku e aneksashon ilegal dje isla di Boneiru den Karibe Sur, e Rei hulandes i su gobièrnu a tuma kontrol kompletu legal i polítiko riba mas ki 200 mia nóutiko di Zona Eksklusivo Ekonómiko di awa Karibense. Boneiru tambe ta poseé un haf ku awa hopi hundu, solamente 50 mia for di kosta di Venezuela anto gobièrnu hulandes a ekspandé rápidamente e airopuerto lokal pasa di nivel komersial internashonal te na nivel di standart militar, tresiendo un guera den Karibe muchu mas serka. Di bèrdat, e focus di Reino ta riba Awa, ta riba kontrol di e awanan Karibense i tur e rekursonan natural den dje.
Finalmente, manera Rei a bisa: “nos tur tin ku biba un bida desente”. Si, nos ku ta e pueblo Boneriano a heredá i atkerí e derecho aki, awor dikon keda mantené nos pueblo supordiná i kolonisá, sin laga nos ehersé nos derecho humano di ta igualmente liber igual ku tur hende den e parti hulandes oropeo di Reino?
Sinseramente,
Sr. James Finies, Presidente di Fundashon Nos Kier Boneiru Bèk
Sra. Davika J. Bissessar, Presidente di Bonaire Human Rights Organization
