Relashoná ku e publikashon resien den media, tokante reunionnan na Hulanda riba desaroyo di infrastruktura pa sosiedat sivil na Boneiru.
BHRO tin Status Konsultativo ku ECOSOC di Nashonnan Uní i ta Miembro Asosiá di CARICOM su Komishon di Reparashon i a representá sosiedat sivil na Boneiru pa e último 18 añanan. Nos bos a zona na numeroso okashon den plataformanan di sosiedat sivil den Nashonnan Uní su sedenan na New York, Ginebra i Viena i den plataformanan internashonal. Sinembargo ta di lamentá ku Ministerio di Interior i Relashonnan di Reino, RCN Programma Pasado-di-Sklabitut Karibe Hulandes i gobièrnu di Boneiru no ta ni aseptá òf formalmente invitá BHRO na eventonan similar na Hulanda, Kòrsou, Aruba, Sint Maarten i riba nos mes isla Boneiru. Ku frekuensia ta trata nos komo invitado no deseá i asta ta asina ku na Boneiru mes, Jan Helmond, direktor di RCN, a pidi nos pa bandoná e sala i no a permití nos pa asistí den un enkuentro, dia 19 di dezèmber 2022, ora ku minister Van Gennip a bini pa pidi “diskulpa” pa e krímennan di sklabitut di Hulanda. Otro momentu tabata ora ku nos a disidí, riba nos mes forsa, kubriendo nos gastunan, pa asistí sèptèmber aña pasá na Sint Maarten, kaminda kasimente a ekspulsá nos for di e enkuentro “Reflekshon Riba Pasado di Sklabitut”, evento ku Sekretario di Estado Van Huffelen a organisá.
BHRO ta diferente for di algun organisashon na Boneiru ku ta disfrutá di finansiamentu i sosten, pasobra BHRO ta operá di forma independiente sin e privilegionan akí. Nos no ta benefisiá di e biahenan rònt mundu pa ripití e vershonnan diktá pa e agènda di institushonnan i gobièrnu hulandes. Por ehèmpel manera eks gezaghebber Rijna komo Enviado Spesial apuntá dor di Hulanda. En kambio nos (BHRO) ta papia ku sinseridat e bèrdat i realidat di pobresa, diskriminashon i e desplasamentu di e nativonan di Boneiru, basa riba nos eksperensia ku nos a biba aki na Boneiru.
Nos intenshon no ta pa kritiká nos koleganan ku asistí na e eventonan akí, pero supliká nan pa konsiderá e perspektivanan balioso di organisashonnan ku tin envolvimentu i trayektoria largu manera nos (BHRO), ku a kontribuí signifikativamente na e debatenan aki na Boneiru, den Reino, den Karibe i nivel mundial.
Falta di inklushon
Pa berdaderamente representá bosnan di e pueblo boneriano, ta esensial pa envolví un representashon amplio di interesadonan den e proseso di desaroyo, inkluyendo esnan ku talbes no ta parti di entre otro Frente Kultural Bonaire, SKAL, Terramar, FUHIKIBO, Magazina di Rei, Akademia Papiamentu i Grupo Diálogo Boneiru.
Sin mekanismonan di transparensia kla, responsabilisashon i inklushon ta eksistí e riesgo ku e desaroyo di infrastruktura di sosiedat sivil lo no sirbi adekuadamente e nesesidatnan di e komunidat. Kualke esfuerso pa fortalesé sosiedat sivil na Boneiru mester rekonosé i atendé ku e impaktonan kontinuo i aktual di kolonialismo riba nos isla. Ta esensial pa e proseso di desaroyo ta inklusivo i ta representá tur segmento dje poblashon di Boneiru, inkluyendo Bonaire Human Rights Organization ku su miembronan di direktiva ku mas ku 20 aña di eksperensia.
Nos ta spera ku e manager-di-programa apuntá pa Hulanda i resien nombrá pa kuminsá pone e kòma despues di e “Diskulpa” pa Pasado-di-Sklabitut den parti Karibense di Reino, señora Lucia Beck, lo hasi esfuerso pa logra inklushon berdadero i invitá Bonaire Human Rights Organization i no sigui ripití e strategia kolonial di dividí i reina. Nos ta urgi e organisadónan pa atendé e preokupashonnan akí pa garantisá ku tur bos ta skuchá i representá den e proseso.
