Kralendijk – Departamento di Salubridat Públiko ta hasi un yamada riba tur hende pa mustra nan kompashon ku pashèntnan di HIV/Aids i pone un sinta kòrá na nan paña dia 1 di desèmber. Djamars 1 di desèmber ta Dia Mundial di Aids. Riba e dia aki e lucha kontra aids ta para sentral i ta hasi un yamada pa mas solidaridat ku hendenan ku HIV i AIDS.
Departamento di Salubridat Públiko ta partisipá ku na Boneiru tin mas òf ménos 75 hende ku HIV registrá. E kantidat mas grandi di e personanan aki ta entre 30 i 60 aña. Kuido ta bon organisá na Boneiru i ta ofresé tratamentu médiko na tur persona ku HIV. Esaki ta sosodé ku máksimo diskreshon pa garantisá privasidat di e pashènt.
Na aña 2020 atenshon di mundu ta dirigí riba e pandemia di COVID-19. E pandemia di COVID-19 ta laga nos mira kon importante prevenshon ta pa prevení un malesa. Tambe nos ta mira kon salú i prevenshon di malesa ta korelá ku kasonan manera redukshon di desigualdat entre persona, derecho humano, igualdat di género, státùs sosial i kresementu ekonómiko. Trahadónan den salubridat i organisashonnan den henter mundu ta hasi nan máksimo esfuerso pa mantené e servisionan di HIV den funshonamentu, no opstante e pandemia di COVID. Pa motibu di e retonan aki e aña aki nan a skohe pa e tema ‘Solidaridat mundial i responsabilidat kompartí’.
Na Boneiru tambe ku regularidat tin atenshon pa tèstmentu pa HIV i AIDS, i tambe pa kombatí e tabú ku ta reina rònt di e malesa aki. Dòkternan di kas ta ofresé nan pashèntnan tèst, enseñansa ta inkluí e tema den nan programa di enseñansa i den tempu di COVID-19 tambe kuido ta sigui nòrmalmente.
Prevení plamamentu di hiv/aids. Hasi sèks na un manera seif, laga tèst bo mes i kuminsá na tempu ku remedi ku ta frena aids si bo ta infektá. Pa mustra bo solidaridat ku hendenan ku HIV/AIDS, dia 1 di desèmber bo por bisti e sinta kòrá.
