MFK a kontinuá ku su bishitanan, pa asina nos por interkambiá ku instansianan i organisashonnan den nos komunidat pa por forma un pensamentu i por hinka un mihó plan di akshon den otro.
Durante di e dos simannan ku a transkurí, MFK a bishita Selikor, korant Amigoe i tambe korant Extra i a hiba kombersashonnan hopi amplio i na nivel ku e instansianan aki. Kaminda nos organisashon a risibí bastante informashon ku ta di un balor agrega pa nos.
Selikor a duna nos un presentashon amplio di forma ku nan ta funshoná i tambe e retonan ku e empresa ta pasando aden. Debí na e situashon ku Kòrsou ta pasando aden relashoná ku e aspekto finansiero i tambe di COVID-19, Selikor a haña su mes obligá pa adaptá nan forma di funshoná i tambe Selikor mester a para algun trabounan ku normalmente nan ta hasi. Tabata interesante pa tende ku Selikor ta trahando riba un akuerdo di trabou nobo entre Selikor i gobiernu di Kòrsou ku lo mester bai garantisá e medionan finansiero ku por kuminsá bek ku e trabounan di limpiesa ku awor aki no ta tumando lugá.
Tambe nos a hasi un bishita na korant Amigoe, kaminda nos a ser risibí pa e direktor di Amigoe, kual ta señor Michael Voges. Den un kombersashon ameno nos a interkambiá riba temanan manera e kompetensia ku korantnan tin na e momentonan aki ku medionan sosial kaminda hopi notisia ta ser publiká, tambe nos a papia riba e desaroyo di teknologia aki na Kòrsou. Ku señor Voges nos a interkambiá di idea tambe riba e plannan ku MFK tin pa trese kambio i alivio den diferente sektor den nos komunidat.
Nos último bishita di e siman aki tabata na korant Extra, e delegashon di MFK a wòrdu risibí pa direktor di Extra señor Romulo Irausquin i tambe e hefe di redakshon kual ta señora Valesca Diaz. Akinan tambe nos a deliberá riba korant vs medionan sosial i ki konsekuensia esaki por tin pa eksistensia di un korant. A kombersá hopi profundo riba e parti di deporte i kon pa yega na un formulá pa gobiernu por kompensá boluntarionan ku ta duna un man den deporte manera ántes esaki tabata sosodé. Tambe MFK a presentá su ideanan relashoná ku próksimo elekshon na e gerensia di korant Extra.
Pa medio di esaki e delegashon di MFK representá pa Gilmar Pisas lider polítiko, Sithree van Heydoorn presidente i Javier Silvania sekretario, kier gradisí Selikor, korant Amigoe i korant Extra pa risibí nos i pa a ekipá nos ku ideanan ku ta kontribuí na e mishon i vishon ku MFK tin pa e pueblo di Kòrsou
