Durante su bishita di trabou na Boneiru, sekretario di estado di Relashonnan den Reino i Digitalisashon sra Van Huffelen a bishitá diferente sitio i a hiba vários kòmbersashon. E rekorido a konsistí di sera konosí ku Konseho Insular i Kolegio Ehekutivo i bishita na diferente servisio i proyekto di Entidat Públiko Boneiru.
E último tres dianan a dediká atenshon na pobresa, konstrukshon di bibienda i ekonomia i digitalisashon, pa medio di hasi bishita na entre otro Fundashon Banko di Kuminda Boneiru, Ofisina di Sentro Regional di Informashon i Ekspertisio (RIEC) Hulanda Karibense, Diálogo Sentral Boneiru, Tayer Fondonan di Union Oropeo pa paisnan i teritorionan ultramar, departamento di Agrikultura, Krio di Bestia i Peska, Biblioteka Públiko Boneiru i e ‘Call Center’ di Entidat Públiko Boneiru.
Durante e bishitanan akí a mira i skucha e desafionan ku tin i kon ta trahando riba esakinan, manera por ehèmpel e bishita na Fundashon Cas Boneriano kaminda a papia tokante planifikashon i konstrukshon di barionan nobo na Boneiru ku bibienda pagabel i sostenibel pa hür i pa kumpra, ku e meta pa kombatí skarsedat di bibienda. I e bishita na Fundashon Banko di Kuminda Boneiru ku un enkuentro ku e direktor i e hopi boluntarionan ku tur dia ta hasi esfuerso pa sòru ku un kuminda nutritivo ta aksesibel pa e personanan ku no por pèrmití nan mes esaki. I tambe e kòmbersashon ku empresanan (di kunukero) den sektor agríkola na departamento di Agrikultura, Krio di Bestia i Peska pa desaroyo di produkshon di kuminda na nos isla pa asina redusí e dependensia di importashon.
En breve, tabata dianan ku mester kontribuí na konsientisashon di loke ta pasando na Boneiru i ku mester krea mas komprenshon den gobièrnu hulandes pa loke ta nesesario na Boneiru i pa loke Boneiru a logra realisá te ku awor durante e último añanan.
‘E último bishita di trabou akí ta laga mi wak bèk ku orguyo riba e añanan tras di lomba i ku inspirashon mira dilanti den direkshon di futuro. Aunke esaki tabata mi último bishita di trabou komo gezaghèber, esaki sigur no tabata e último bishita di trabou di mi karera. Den mi ròl nobo komo Enviado Spesial pa Hulanda Karibense mi ke mehorá akseso na e fondonan di Union Oropeo i Nashonnan Uní, pa asina oumentá prosperidat i amplia e base ekonómiko. Di e manera akí mi ta spera di akselerá i fortifiká e diferente inisiativanan na Boneiru, manera por ehèmpel e proyektonan i servisionan ku nos a opservá durante e bishita di trabou akí.’
