Fundacion Kapel di Bethania (FKB), tin e grato honor di anuncia bishita di Zr Marjolein for di Hulanda.
Zr. Marjolein ta un di soeurnan di e ordo di Dominicanesnan di Bethania cu a traha den e bario di Noord, na Imeldahof, na diferente schoolnan y a biba den e klooster Imeldahof.
Diadomingo awor pueblo di Aruba ta keda cordialmente invita pa un actividad familiar di bin cera conoci y saluda soeur. E actividad lo cuminsa pa 10 or di mainta te cu 2 or di atardi. Pa 11 or di mainta Zr. Marjolein lo tene un charla tocante su experencia di bida como soeur, e periodo cu e a biba den Klooster Imeldahof y tambe unda nan tur ta awor.
Di un bishita na Aruba, Zr. Marjolein a haña su vocacion lagando su trabao y su comprometido na Hulanda, pa asina entrega su mes na e bida religioso. Un bunita testimonio di un persona cu na un edad hoben ta dicidi di cambia tur su planes y entrega su mes totalmente na un bida spiritual.
Durante e dia aki lo tin oportunidad pa un y tur por combersa cu soeur, Y tambe por bishita e exposicionnan “ Historia di parokia di Noord” y “ Caribbean Ties”. Nelson Thiel lo ta presente cu su caha di orgel pa deleita publico presente cu dushi musica. Naturalmente bar y cushina lo ta bon surti.
Pa mas informacion por bishita e pagina di facebook di Fundacion Kapel di Bethania.
