Bonaire

Biblioteka Públiko Boneiru ta hasi entrega di sertifikado na partisipantenan di e kurso di kòmpiuter ‘Klek i Taip: E Base’ durante un klousura festivo

Kurso Klek I Taip Grupo

E kurso piloto di kòmpiuter ‘Klek i Taip: e base’ ku dia 3 di òktober 2022 a kuminsá bou di guia di Biblioteka Públiko Boneiru a terminá den un forma festivo dia 31 di òktober 2022. Durante e klousura festivo akí e kursistanan a risibí un sertifikado pa motibu ku nan a finalisá e kurso. Durante e kurso akí 15 kursista a sera konosí ku kòmpiuter. E partisipantenan ta kliente di Zorg en Welzijn Groep Boneiru. Studiantenan di MBO ICT a duna e kurso di kòmpiuter ku a keda organisá den kolaborashon ku departamento di ICT i e grupo di trabou Digitalisashon di Entidat Públiko Boneiru. 

Durante e sinku enkuentronan e partisipantenan a sera konosí ku diferente aparato ku ta pertenesé na kòmpiuter, manera por ehèmpel keyboard, mouse, speaker, headset etc. Nan a trein e abilidatnan básiko pa kòmpiuter tambe. A trata preguntanan manera ‘Kon mi ta sende un kòmpiuter? Kon mi por taip? Kon mi ta manda un email? Kon mi ta sùrf riba internèt?’ A trein tambe ku trahamentu di sita riba www.bonairegov.com. Durante e último enkuentro e kursistanan a haña un ripitishon di e materia. Finalmente nan a evaluá nan konosementu pa medio di traha un kwes i nan a risibí un sertifikado. 

For di aña pasá Entidat Públiko Boneiru ta trahando riba digitalisashon di su trabounan. Esaki por ta fastioso pa habitantenan di Boneiru ku ménos abilidat digital. Esaki pasobra digitalisashon tin influensia riba funshonamentu diario di tur hende i e desaroyonan ta bai hopi rápido. Entidat Públiko Boneiru ta tene kuenta ku esaki den su proseso di digitalisashon pa medio di kontinuamente duna informashon i treinen na komunidat. Mas lat den aña lo kuminsá ku un di dos kurso básiko tambe. Bo no tin kòmpiuter na kas i bo ke sera konosí ku kòmpiuter? Bo tambe ke siña e pasonan básiko akí? E ora ei bo ta bon biní pa registrá for di awor akí pa e kurso. Pa mas informashon tokante e posibilidatnan bo por tuma kontakto ku Biblioteka Públiko Boneiru via number di telefòn 715 – 5344. 

Biblioteka Publiko Boneiru Ta Hasi Entrega Di Sertifikado Na Partisipantenan Di E Kurso Di Kompiuter ‘Klek I Taip E Base Durante Un Klousura Festivo

Related posts

Compagnie in de West’ di Defensa den Region Karibe ta hasi traspaso di rotashon

EA News Author

TCB ta inspirá hóbennan boneriano den kolaborashon ku Scholengemeenschap Bonaire (SGB) i e artista lokal Norwin (Nòchi) Coffie

EA News Author

Polis di bario bo por conta cu ne

EA News Author

Leave a Comment

Whatsapp Message