Ta hopi importante pa tur ciudadano sigui cuida y vacuna
Durante conferencia di Prensa diahuebs atardi, Prome Minister Evelyn Wever-Croes hunto cu Ronella Croes di ATA y Sharline Koolman di DVG a duna un relato di e situacion di Covid-19 na Aruba y a anuncia e cambionan di maneho cu lo bin na vigor entrante diadomingo 1 di augustus, 2021.
E prome cambio ta trata e testmento pa biaheronan cu ta drenta nos pais desde Merca, e test di Covid ta bira obligatorio irespecto si e persona ta vacuna. Esaki considerando cu mescos cu Hulanda y Colombia entre otro paisnan, Merca ta wordo considera como un pais di ‘High Risk”. E di dos cambio ta e seguro di Covid. Esaki ta bira pa bishitante adulto, $15 pa henter e estadia y pa muchanan ta gratis.
Prome Minister a accentua cu apesar cu e casonan positivo ta subiendo, Gobierno di Aruba ainda lo no implementa medidanan severo pero si ta pidi tur ciudadano pa sigui cuida.
Mi ta kere nos mester para keto cu nos tin un problema na Aruba. Awor cu nos tin cu bati alarma mesora pero lo no cera Aruba y hendenan den cas sinembargo ta importante pa nos ta alerta cu e virus tey y e tey pa haci daño y e ta den nos man si nos ta permiti’e haci daño of no. E situacion na Hospital ta stabiel. Tin 9 hende interna di cual 2 ta den ICU dus mester tene cuenta cu esaki”, Prome Minister a duna di conoce.
Por tuma nota cu e cifranan pa cu Covid ta subiendo. E cifranan di diahues ta mustra cu e casonan activo a subi na 349, “cual ta un suma relativamente halto”, Prome Minister a accentua.
E suma aki a redobla den e ultimo 4 pa 5 dianan y esaki ta motibo cu Gobierno ta alerta y preocupa pa cu e situacion aki. E averahe pa dia ta riba 30 y esaki ta halto tambe siendo cu un siman pasa e tabata na 15-16. Esaki tambe a redobla.
E situacion di Aruba compara cu Corsou e siman aki a cambia. Siman pasa e tabata diferente pasobra e casonan na Aruba no tabata creciendo asina tanto y Corsou a yega na un plateau. Aworaki na Corsou e situacion a stabilisa pero na Aruba si e cifranan ta bayendo halto.
Esaki ta pa nos realisa cu si nos no frena e desaroyo aki, nos lo end up igual cu Corsou riba 600 caso y nos no kier esey, nos kier evita esaki. Gobierno lo no tuma e medidanan mescos cu nos a tuma na maart pa cuida cada ciudadano. Nos ta akinan pa bisa cada ciudadano cu ta hopi importante pa abo cuida y encurasha bo pa vacuna. Si bo no por y no kier vacuna por fabor cuida bo mes. Esaki ta bo responsabilidad, bo escogencia. Nos no ta forsa niun hende pa vacuna pero cuida bo mes si e ora”.
