KRALENDIJK, Bonaire
Barku krusero Caribbean Princess ta hasiendo un asina yamá ‘live saving equipment test’ na parti nort di Klein Bonaire. ,,Esaki ta un tèst pa wak si tur ekipo ta funshoná bon si mester evakuá hende si surgi un kalamidat. E tèst a kuminsá 10 or di mainta i ta dura te 16:00 or di atardi. Despues di esei e barku ta bandoná Boneiru, i bai Kòrsou bèk,” asina kapitan di haf Gunther Flanegin a splika.
,,E barku kier a hasi e tèst promé den laman enfrente di aeropuerto BIA. Pero esei no tabata posibel, ya ku lo el a keda drif riba laman nèt den e zona ku ta riba ruta di avionnan ku tin di baha na BIA.” Flanegin a tuma kontakto ku BIA pa wak si tabata posibel pa e barku hasi e tèst na e lugá ku nan tabata ke.
,,Mirando e kantidat di buelo ku tin awe planiá pa yega BIA, a skohe pa no laga e barku bai na e lugá ku nan tabata ke. A skohe e ora ei pa laga e barku bai parti nort di Klein Bonaire. Caribbean Princess lo keda drif na un distansia di un mia for di kosta di Klein Bonaire.”
E barku a yega Boneiru djaweps mainta trempan. Su presensia a lanta basta pregunta ya ku debí na COVID-19 te novèmber niun barku krusero no ta bini Boneiru. Ta tripulashon di e barku so tabata na bordo. Tripulashon di un barku krusero ta obligá pa tèst regularmente kon pa aktua na momento ku mester evakuá pasahero.
