Husto na momento cu operadornan di kioskonan a yega na oficina di gobierno pa pidi pa papia cu prome minister Evelyn Wever Croes, tabatin e reunion di Conseho di Minister di tur diabierna tumando luga. Tabatin un tema masha importante den discusion pa cual a laga un consehero halto di e mandatario tuma e documentonan, cu e mensahe cu e lo duna debido atencion na e problema.
Awe sigur tabata un dia hopi pisa cu dos di tres “demostracion” cu tabatin di haber cu Departamento di Infrastructura.
E mandatario despues di a ricibi e documentonan for di su consehero, a mustra di no ta contento y sorprendi cu e situacion aki. Mas si mira cu e problema aki tin un aña caba andando. Pues e problema a pasa den man di dos mandatario cu no a haci nada pa soluciona e problema. Pero e director Jaime Croes tampoco a trece solucion pa e grupo aki cu tambe a keda afecta pa e pandemia, mirando cu nan ta depende directamente di turismo crucero.
E mandatario a pidi su staff pa cuminsa traha di biaha riba e asunto aki. Esta cuminsa lesa tur e documentonan entrega, wak unda e problema a keda pega y papia cu e persona cu no a haci su trabou.
E ta un situacion dificil pa motibo cu e ta algo cu por a keda soluciona, si a simplemente contesta e cartanan of sinta na mesa y yega na un areglo cu esnan cu ta huur kiosko.
Mester bisa cu e mandatario tin apenas algun luna cu el a tuma e cartera di infrastructura despues cu Marisol Lopez Tromp a haya su retiro. E mes a bisa di no ta bay mete pero ta laga e hefe di departamento haci su trabou y solamente un biaha pa luna mester raporta na su persona. Pero awo ta parce cu esaki tampoco lo no por, ya cu e trabou no ta wordo haci. Y ta trata aki di cosnan urgente na momento cu Aruba ta pasa den un situacion di crisis unda cu e grupo aki tambe ta depende di turismo pa operacion di nan negoshi. Mirando tur e carteranan pisa cu ya caba e mandatario tin como prome mandatario di pais Aruba y cu ta solamente ta algun luna ta sinta cu tin e cartera di infrastructura ta mas cu realistico cu e mandatario mester di e espacio nesesario pa por atende, scucha y pensa pa traha solucionnan pa e departamento di DIP cu ta parse cu ta un barco sin rumbo.
