ORANJESTAD, Aruba
Recientemente a tuma luga e prome edicion digital di “Global Money week”, un evento educacional anual riba nivel mundial, cu ta enfoca riba educacion y conscientisacion den e area financiero.
“Give Back” of duna bek na e comunidad ta un colaboracion entre Banco di Caribe, Ennia y Kiwanis Club of Aruba pa siña e muchanan e importancia pa duna bek na e comunidad di Aruba, y con pa traha hunto pa asina logra nan meta y propositonan. Siman pasa e muchanan por a mira un video cu entrevista realisa cu Cruz Cora y Fundacion Pa Nos Comunidad, unda por a siña asina un poco mas di e fundacionnan y e trabou cu nan ta haci na beneficio di nos comunidad.
En conexion cu e clausura di e siman di duna bek na nos comunidad, Banco di Caribe, Ennia y Kiwanis Club of Aruba a haci entrega di un donacion na Cruz Cora y Fundacion pa nos Comunidad. Ta hopi importante pa aporta na nos comunidad y di e forma aki ta spera di por stimula mas campaña pa duna nan aporte, paso na final ta hunto so nos por haci un diferencia.
Por ultimo ta gradici tur e muchanan cu a participa y a haci e prome edicion digital di “Global Money week” uno exitoso.
