Diamars anochi, a tuma luga un biaha mas e evento organisa pa Partido Movimiento Electoral di Pueblo MEP, “Ban Topa”. Den un sala completamente yen na Centro di Bario Piedra Plat, Lider di partido Evelyn Wever-Croes y Xiomara Maduro a duna presentacion nan hopi detaya y importante, na unda a ilustra e trabounan principal cu nan a bin ta desplegando durante gobernacion di GabineteWever-Croes.
E anochi aki, mescos cu tur otro evento di “Ban Topa”, tabata uno exitoso. Esnan presente a haci varios pregunta y sugerencia, pero alabes a duna aplauso na tur e logronan, apesar di tur reto, di e gobierno actual. Partido Movimento Electoral di Pueblo MEP ta gradici e bario di Piedra Plat specialmente pero tambe di tur otro barrio na Aruba, pa nan participacion y ta spera di por conta cu nan sosten pa cu e siguiente eleccion dia 6 di december proximo.
Lider di MEP ta haci invitacion pa keda pendiente pa e siguiente “Ban Topa” cu lo wordo anuncia pronto. E meta di “Ban Topa” ta pa candidatonan riba lista, reuni cu habitante di e bario cu nan ta representa, pa asina comparti informacion nan valioso cu e habitantenan como tambe scucha di pueblo kico ta e opinionnan y preocupacionnan.
