En conexion cu di dia di Himno y Bandera, Ban Serio Aruba kier contagia bo cu orguyo.
Ban Serio lo tin e aña aki un competencia di pintamento y un competencia di poema cu e tema orguyo pa Aruba.
E competencianan lo ta e inicio di Ban Serio Aruba su campaña nobo pa 2022 “Ban Serio ta contagia bo”. E idea ta pa contagia pueblo di Aruba cu e balornan cu ta importante pa nos como nacion, manera orguyo pa nos cultura, cuido pa nos medio ambiente, y atencion pa nos siguridad y nos amabilidad, algo cu Aruba ta conoci p’e.
E prome fase di e campaña lo enfoca riba: “Ban Serio ta contagia bo cu orguyo” den cuadro di nos dia di Himno y Bandera. Nos ta cuminsa cu un competencia di pintamento pa mucha entre 4 – 12 aña. Nos ta pidi pa haci uzo di bo creatividad y uza materialnan menos convencional manera taki, mata, santo, flor, glitter biodegradabel y cualkier otro material cu bo por imagina. Pa por participa den nos competencia di pintamento por download un PDF via e pagina di Instagram of Facebook di Ban Serio Aruba. Por entrega e pintura entre dia 11 y 16 di maart na Biblioteca Nacional na Oranjestad, Biblioteca San Nicolas of Oficina di Turismo (pabou di Talk of the Town).
Ademas Ban Serio Aruba lo tin un competencia di poema, pa hoben y adulto di 14 aña bai ariba. E hoben poeta local Mary-Kay Quandus a skirbi un bunita poema, cual abo lo mester caba. Nos ta pidi cada participante pa ta creativo y expresa e orguyo y amor pa nos dushi Aruba. Por encontra e poema aki via nos Facebook y Instagram page di Ban Serio Aruba. Por entrega e ultimo parti di e poema via e inbox (DM) di Ban Serio Aruba su Facebook y Instagram.
Ambos competencia lo conta cu premionan dibertido cu lo yuda pa conoce Aruba un tiki mas.
Keda pendiente pa nos calendario di evento pa Dia di Himno y Bandera cu lo sali ariba nos medionan social.
Ban Serio Aruba ta un iniciativa di Aruba Tourism Authority y tin como meta pa crea un conscientisacion local tocante Aruba su cultura, medio ambiente, cordialidad, y siguridad. Pa mas informacion wak e pagina di Facebook of Instagram di Ban Serio Aruba.
