Nos ta dilanti di un otro edicion di Festival di Buki pa Mucha. Biblioteca Nacional Aruba ta organisa esaki pa stimula mucha pa lesa y lanta nan interes pa storia y tambe pa tur tipo di topico. E aña aki e festival ta den un forma nobo digital y e atencion ta bay riba storia y informacion historico, como cu e tema ta ‘Historia’. E Festival di Buki pa Mucha ta un siman largo y ta tuma lugar den e prome siman di november. Dia 30 di october pa dia 6 di november. Mas cu 60 scol ta participa na e actividadnan online.
Diferente autor di buki y ilustrador ta stimula mucha pa lesa. Presentacionnan ta bay scol di un forma virtual pa medio di Smartboard. Escritornan cu ta parti di e festival ta: (Insert links) Jeroen Hoogerwerf, Evelien van Dort y Lizzy van Pelt. For di Corsou biblioteca a invita Tio Ali (Alvin Inecia) y Mercee Doran. Di Boneiro ta spera Monica Clarinda. E grupo di Aruba mes ta consisti di e talentonan creativo: Richard Dabian, Liliana Erasmus, Robert Reeberg, Benjamin Romero y Elvis Tromp como ilustrador. Esaki ta un grupo di profesional riba tereno di conta storia, skirbi storia pa mucha y ilustra storia. Riba biblioteca su website por haya informacion di tur escritor participante y tambe di ilustrador Elvis Tromp. Scolnan participante ta haya e informacion tocante tur escritor di buki pa mucha den nan pakete.
Cu e lema ‘Tempo di mi tempo…’ biblioteca ta invita mucha pa biaha den tempo. Lesando un buki e mucha por descubri hopi di historia di mundo y nos isla. Lesamento ta enrikece e imaginacion, dominio di idioma y tin hopi mas beneficio.
Scol, libreria y otro instancia ta forma parti di e festival. Lo tin actividad na scolnan participante y na biblioteca na Playa y San Nicolas den prome siman di november. Apertura di e festival lo ta via Aruba.tv (Canal 49), diabierna dia 30 di oktober pa 7or. Un y tur ta bon bini pa wak e apertura.
