Despues di e eksitoso obra teatral “Shonnan Bin Tende un Kwenta” ACE Foundation ta kla pa ranka sali ku inskripshon pa siguiente obra “Ban konstruí Bonaire 3.0”. Kon abo lo ke mira Boneiru? Kiko por bai mihó? Ki profeshonnan abo lo ke mira krese riba nos isla? Ser artista ta un trabou òf hòbi? Tur esaki i mas lo wòrdu tresé den e den e obra teatral aki.
ACE Foundation ta hasi un yamada na hóbennan di 13 t/k 27 aña ku ta interesá pa desaroyá nan talento riba tereno di aktuashon, baile, kanto, músika, arte i asta multi-media tantu komo amateur i profeshonal pa tuma kontakto ku ACE Foundation pa mas informashon. ACE Foundation lo bini ku “coachnan” profeshonal ku eksperensia amplio riba nan tereno pa guia e hóbennan durante e trayekto di 8 siman aki.
ACE ta kla pa ranka sali ku workshopnan riba e disiplina ya menshoná. E workshopnan aki lo dura 8 siman largu i na final e artistanan aki lo wòrdu enkargá pa huntu krea e obra “Ban konstruí Bonaire 3.0.” usando tur e konosementu ku nan lo risibí den e 8 simannan di workshop.
E proyekto aki ta sali di un kolaborashon entre Openbaar Lichaam Bonaire i MDT Nederland ku ta aktivo riba e tereno di Arte i Kultura na Hulanda. Esaki ku e meta pa promové desaroyo talentonan artístiko i ala bes hasi algu pa otro. Ku esaki ke logra reforsá union den komunidat.
ACE Foundation a skohe pa ku e proyekto aki traha ku hóbennan di 13 t/k 27 aña paso ta haña ku ta importante pa e grupo aki interkambiá ku otro. Dikon? Un hóben di 13 aña ta sintá den un di e temporadanan mas difísil di su bida, lokual nos konosé komo pubertat. Despues di esaki ta sigui e etapa di adolesensia ku ta dura di 16 t/k 21 aña. Despues di esei bo ta un adulto hóben. E tres gruponan aki por yuda otro, komprendé otro, yuda otro krese i tambe siña kosnan nobo manera por ehèmpel, kon mester trata otro personanan ku ta sea mas grandi òf mas chikitu ku bo. E meta final ta pa motivá i inspirá e hóbennan aki pa skohe e profeshon adekuá pa nan
futuro pa yuda krea un mihó Boneiru. Ku Bonaire 3.0. nan krea i presentá un vishon pa un futuro personal sino pa komunidat kompletu.
E hóbennan ku ke inskribí por tuma kontakto ku ACE Foundation via nos Whatsapp na number di telefòn +5997900155 i tambe via nos paginá di Facebook, ACE Bonaire.
