Djasabra 30 di sèp 2023 MPB tabata tin su evento di ‘Ban Kombersá ku MPB kombiná ku un BBQ pa rekoudá fondo na Sede di Mentor for di 10or di mainta pa 3or di atardi. Ku e evento akí MPB a habri su portanan pa un i tur por pasa kombersá ku dirigentenan i demas miembronan di MPB riba kualke tópiko hasiendo pregunta òf interkambiá di pensamentu.
‘Ban Kombersá ku MPB’ ta un evento ku lo sigui tuma lugá kada pasa 3 luna. MPB tin un kalendario ku diferente otro eventonan manera kurso, kaminata, bingo, rifa, stènt riba Dia di Boneiru pero tambe stènt riba dianan di fiesta di diferente bario.
MPB kier yama danki na tur hende ku a koperá kumprando un òf mas karchi di BBQ i tambe un danki ta bai na tur hende ku a yuda ku e organisashon di e evento akí. Ku fondo ku MPB a krea ku e evento akí a hasi un donashon na un organisashon di grandinan koperando ku selebrashon di ‘Dia Internashonal di Grandinan’ ku a tuma lugá djadumingu 1 di òktober.
