Direktiva di ACU, ku ta bou di supervishon di kuratornan nombra pa Banko Sentral, a pone un konsepto di kambio di modelo di e kooperativa ACU riba mesa kaminda sosio(nan) mester bai vota pa kambio fundamental di nan organisashon di mas di kasi 60 aña di eksistensia. E proposishon di kambio di statuto di ACU den práktika ta enserá ku ta direktornan ta tuma tur kòntròl i sosionan (reunion general) no tin bos mas.
Pa Partido MAN e hende ta sentral i komo tal mester salbaguardiá dignidat di sosionan.
Kòrsou tin un historia riku riba tereno di kooperativismo, manera kooperativanan di spar i krédito i tambe otro kooperativanan sektoral manera entre otro sektor agrario. E lucha di defuntu Mgr. Amado Romer, pionero i Tata di Kooperativismo aki na Kòrsou mester ser salbaguardiá.
MAN ta konsiderá Kooperativa un pilar ekonómiko importante den desaroyo sosial-ekonómiko duradero di Kòrsou. MAN ta kere firme ku union ta hasi forsa i ta hasi un yamada fraternal i direkto riba sosio(nan) di ACU i prinsipalmente esnan ku ta miembro di nos organisashon pa inskribí i bai vota masal kontra e intenshon di kambio di statuto kual tin riba mesa na e momento aki.
MAN, hustamente den e tempu difísil ku nos ta pasando, ta kere firme ku e balor di kooperativismo ta di sumo importansia pa nos produsí nos mes kuminda i kolaborá i traha huntu.
Kontrali na e kambio di statuto di ACU ku tin riba mesa awor aki, MAN ta boga pa promové desaroyo sosial-ekonómiko duradero i yuda fortalesé i stimulá kooperativanan i nan organisashon madre FEKOSKAN pa amplia konsientisashon i konosementu riba temanan di kooperativismo i krea posibilidatnan pa kondishonnan faborabel (p.e. fiskal) ku ta hasi posibel pa kooperativanan sigui floresé na Kòrsou.
Finalisando Partido MAN ke enfatisá ku kualke kambio ku ke implementá den organisashonnan di koperativa mester ta basá riba e prinsipionan fundamental di koperativismo kual ta:
- Miembresia Boluntario
- Kontrol demokrátiko di miembresia
- Partisipashon ekonómiko di miembronan
- Outonomia i independensia
- Edukashon, formashon i informashon
- Koperashon entre kooperativanan
- Kombibensia ku bo komunidat
