Tabata frère Alexius, kende a encurasha su coleganan frère Paulino, frère Antonius y e otro frèrenan, pa lanta e grupo hubenil aki. Te ainda e grupo aki ta existi. Frère Alexius ademas tabata bon amigo cu artistanan hoben Arubiano, kendenan a mira cu bon wowo e posibilidad pa e frère stima aki forma un grupo di canto y musica, pa asina mantene e musica Arubano bibo. E amigonan aki tabata entre otro Padu Lampe, Hubert Booi (d.f.m.), Toti Arends (d.f.m.) y tambe Rufo Wever (d.f.m.). Despues di a experimenta un tempo cu e grupo hubenil, poco poco De Trupialen a bin descubri su mes direccion, esta esun di un grupo cultural, cu ta dedica su mes na preserva y na mes momento promove y divulga e cultura Arubano. E prome idea tabata pa e grupo canta misa hunto cu e coro di e frèrenan, pero e acogida tabata asina grandi, cu poco tempo despues a cuminsa pidi e grupo pa canta na otro ceremonianan oficial tambe. Dos persona cu a yuda frère Alexius hopi e tempo ey cu cantica, tabata Pascuala Maduro y Lennie Coronel.
De Trupialen a haya nan nomber di e parha admira pa hopi hende, pa su elegancia y bunita canto. Y desde nan nacemento na 13 di januari 1953, nan ta biba den curason di mayoria Arubiano como representacion di e bunitesa di nos musica Arubano.
De Trupialen a dicidi, despues di a mira e impacto cu tabatin den comunidad, pa expande su actividadnan. E lidernan encarga cu e grupo, bou guia di frère Alexius, a cuminsa siña e muchanan toca instrumento musical y tambe pa nan hunga comedia. Poco tempo despues e coro tabatin su propio banda musical Los Elegantes. Ademas di comedia e muchanan a haya oportunidad pa profundisa nan mes den teatro, pero tambe den actuacion di obra di poppenkast, cu te awe ta activo y cu a bira masha famoso tanto pa mucha como hende grandi.
E canto di e grupo a hala masha atencion, pero a trece tambe masha discusion, pasobra frère Alexius a tribi den añanan cincuenta pa canta canticanan na Papiamento. Prome biaha cu frère a laga canta cantica na Papiamento den publico tabata na ocasion di ‘Aña di La Reina’. Frère a haya masha hopi critica mes, pero tambe masha hopi elogio.
E prome disco cu De Trupialen a graba tabata un composicion di Rufo Wever y Padu Lampe, ‘Aruba Dushi Tera’, e cancion cu awe, despues cu nan a modific’e, a bira nos Himno Nacional.
Manera cultura tabata desaroya na Aruba, asina tambe tabata e caso cu e grupo hubenil popular aki. Grupo di gaita y sinfonia di boca a haci nan entrada na club. Na final di añanan sesenta festival di canto a cuminsa bin hopi na moda y De Trupialen no a keda ’tras. Tur e gruponan tabata organisa nan mesun festival. Di 1985 te 1991, durante e periodo cu actividad musical den club a para temporalmente, señor Bill Tromp a dicidi di cuminsa cu un grupo di poppenkast y tambe di comedia.
Asina aki a logra mantene un di e actividadnan cultural mas popular di e club na bida. Pero tabata obvio si cu De Trupialen tabatin mester di sosten. Y esaki a bin tambe. Na 1991 a habri e posibilidad pa genera miembro nobo y pa ta exacto dia 27 di september, cu Lem Pieters como director musical y Mario Tromp como su asistente, De Trupialen a cuminsa atrobe cu les di canto. Y no a tarda mucho, pa un biaha mas e grupo hubenil aki gana curason di un generacion nobo di Arubiano. E grupo a produci su prome disco compacto ‘Ora Ubao’ na 1998. Tabata remarcabel cu e padrinonan tabata den persona di no menos cu Padu Lampe y Hubert Booi, kendenan a yuda frère Alexius lanta e grupo 35 aña prome.
Na 1994 e grupo a ricibi e merito como ‘Grupo Musical di Aña’ pa International Artist Event, mientras cu alabes a keda galardona cu e Premio Den Ambiente Junior Award. Un aña despues De Trupialen a ricibi e Premio ‘Mo Tito y Rufo Wever’ y na 1998 a keda reconoci cu un plakkaat di merito di Telearuba. E mesun aña, e grupo hubenil a ricibi otro plakaat di merito, e biaha aki di parti di Minister Lily Beke-Martinez.
Den e 65 añanan di De Trupialen, nan a sa di haci hopi curason den tur skina di Aruba contento cu nan canto, comedia, musica y nan famoso poppenkast. Mester bisa cu nunca e lidernan di De Trupialen a purba di para e actividadnan progresivo di nos hubentud.
De Trupialen ta pa tur cu a forma parti di dje, un luga cu tin alegria. Un luga caminda a nace amistad pa resto di nan bida. Esey tabata y ta sigui ta De Trupialen. Un fuente di alegria, talento y crecemento di nos yiunan pa un bon futuro.
Den e buki BaluArte por lesa y haya sa mas di nos baluartenan cultural di nos pais. Tur esnan interesa den e buki BaluArte por pasa buki na Plaza Bookshop, Van Dorp y De Wit Stores na San Nicolaas y Oranjestad. E prijs di e buki ta 55 florin.
