Diasabra awor desde 9’or di anochi te cu 1’or di marduga lo tuma lugar den e sitio nocturno Cage Nightclub un fiesta bailabel cu musica di decada 60 y 70 cu animacion musical di e banda Back on Track di Ito Stamper. E tipo di fiestanan aki ta sumamente popular serca un publico specifico cu ta encanta topa otro y disfruta di e musica di e epoca di mas placentero di nan bida.
Varios ta e iniciativanan den pasado cu a tuma lugar pa complace cu deseo di e grupo grandi di fanatico di e musica di e epocanan aki pero lastimamente cu entre otro yegada di e pandemia, hopi di esaki a stop.
Awor cu e situacion ta hopi mas normalisa, e deseo di e amantenan di e bon musica aki ta aun mas grandi pa sali for di cas y distrae nan mente den un ambiente placentero. Pa complace cu e deseo y demanda aki, a dicidi di cuminsa cu e tradicion cu tur prome diasabra di luna lo tuma lugar un fiesta “Back to the 60s & 70s” den Cage Nightclub.
Cage Nightclub ta situa den King Plaza Mall. Net banda di Starkaraoke riba Sasakiweg (Avenida Nelson O. Oduber). Banda di Taco Bell. E ta e club nocturno perfecto pa actividadnan asina. Esnan cu a bishita e club aki por expresa con placentero e ta sinti pa goza y baila aden.
E entrada recauda pa cu e fiestanan aki lo wordo destina na Fundacion Go Cultura pa desaroyo y empoderamento di e sectornan cultural y creativo di nos isla. E fondonan aki lo cubri iniciativanan cu tin di haber cu proyectonan artistico, cultural y creativo y cu tin impacto riba desaroyo cultural, social y economico di Aruba.
Nos ta invita bo pa asisti na Cage Nightclub, y disfruta di momentonan grato pagando solamente 35 Florin pa entrada y contribui alabes cu causanan noble y importante pa nos dushi isla.
