Recientemente a tuma luga e 2do sesion informativo pa e dunadonan di cuido den cuadro di e campaña ‘Ban reforma pa garantisa AZV’. A toca e topico lista di remedi y pues e cambionan cu ta spera entrante 1 di oktober.
Presentacion
Tabata un anochi bon bishita cu alrededor di 100 profesional entre otro boticario, asistente di boticario, asistente di dokter di cas y specialista y unda director Edwin Jacobs a yama bon bini na cada dunado di cuido. Dentro di su palabra di bon bini a inclui e peticion pa colaboracion pa cu e cambio importante aki. Un cambio di reforma pa garantisa seguro AZV. E presentacion di e cambionan den e lista di remedi mes a keda den man di señor dr. Joost Samuels MD y señora drs. Utra Marapin. Hunto nan a elabora riba e tres cambionan principal di e lista di remedi y a contesta varios pregunta. Otro presentado tabata señor Joost van de Kamp kende a mustra con por busca y haya informacion di e remedinan riba e website di AZV. Interesante tabata ora el a presenta e (prome) video cual lo wordo uza pa informa, conscientisa y prepara e aseguradonan pa e cambio.
Feedback ricibi
Diferente dunado di cuido a duna nan critica constructivo cual tabata sumamente importante pa asina OE AZV por evalua, adapta y implementa e sugerencianan durante di e campaña di informacion. Entre tanto, e campaña di informacion pa e aseguradonan tambe a inicia. Via diferente canal manera radio, tv, e website y pagina di FB di OE AZV a cuminsa brinda informacion. Gradualmente lo intensiva e actividadnan aki incluyendo e apertura di un liña di telefon special cu lo uza pa atende yamada y whatsapp. Di e forma aki AZV lo facilita e comunicacion pa contesta e preguntanan cu e asegurado por tin. E meta principal ta cu 1 di oktober 2022 comunidad di Aruba ta bon informa y prepara pa e cambio.
