Ayudo financiero extra pa aña escolar 2020/2021 pa esunnan den bijstand

ORANJESTAD, Aruba

Den luna di october tur persona cu ta den bijstand y cu ta bay scol, tin e posibilidad di haya un ayudo financiero extra. E ayudo financiero extra ta wordo paga un biaha so y ta consisti di dos parti:

1. ‘Schooluitkering’ (Subsidio Escolar).
2. ‘Ouderlijke bijdrage’ (Contribucion di Mayor).

Ken ta bin na remarca?

Tur persona cu ta ricibi un bijstand normal of esun di persona cu limitacion (guns), cu ta entre 3 te cu 24 aña, cu ta bayendo scol regular durante dia y cu ta riba payroll di luna di september 2020.  

Cu scol regular kiermen scol preparatorio (kleuterschool), scol basico, scol secundario, Middag-MAVO y Scol Duna un Man. E yiu(nan) mester ta bibando cerca e mayornan concerni y tambe mester ta ricibiendo e ‘toelage’ di AWG 250,- pa luna.

‘Schooluitkering’ (Subsidio Escolar)

E ‘schooluitkering’ ta un ayudo pa yuda cubri gastonan di scol y ta consisti di un suma di AWG 220,- pa cada persona den bijstand cu ta bay scol te cu un maximo di AWG 800,- pa famia. E ‘schooluitkering’ ta wordo paga hunto cu e pago regular di bijstand riba diasabra 10 di october 2020.

‘Ouderlijke Bijdrage’ (Contribucion di Mayor)

E ‘ouderlijke bijdrage’ ta consisti di un suma maximo di AWG 120,- pa cada mucha/persona. Mester tene na cuenta cu si e suma di e ‘ouderlijke bijdrage’ na e scol ta mas halto cu AWG 120,-, e mayor mes mester paga e diferencia. E ‘ouderlijke bijdrage’ ta wordo paga directamente na e scol.

Rekisitonan

Pa por haya e ayudo financiero extra pa e aña escolar 2020/2021 mester cumpli cu e siguiente rekisitonan.

• E mayor mester puntra e scol(nan) concerni ki maneho e tin pa busca e formulario di scol di Departamento di Asunto Social. Mirando cu tin un “schedule di entrega”, kisas e scol tambe lo traha un “schedule di reparticion” pa asina evita aglomeracion.
• E mayor mester yena e formulario aki completo y bon.
• E mayor mester trece e formulario yena hunto cu e carnet di bijstand na oficina di Departamento di Asunto Social Oranjestad, segun e “schedule di entrega” cu a haya hunto cu e formulario di scol, entre dialuna 21 di september 2020 te cu diabierna 25 di september 2020, entre 8:00 am te cu 11:30 am y di 1:30 pm te cu 4:00 pm.

Tene bon na cuenta

Tene bon na cuenta cu si no entrega e formulario di scol segun e schedule cu a ricibi, esaki lo trece e siguiente consecuencianan:

• E bijstand lo
• E bijstand di luna di october 2020 lo wordo blokia.
• No lo ricibi e ‘toelage’ mensual di AWG 250,- pa yiu(nan) entre 3 cu 24 aña cu ta bay scol, te ora presenta cu e formulario di scol y ora e wordo adapta, e ta sosode sin forsa retroactivo.
• Si bo trece e formulario di scol despues di dia 25 di september 2020, tene na cuenta cu bo ta perde e derecho di e ayudo financiero extra di ‘Schooluitkering’ y Ouderlijke bijdrage pa e aña escolar 2020/2021.
• Despues di haci e ahustacion necesario, bo lo haya solamente e ‘toelage’ di AWG 250,- mensual.

Importante

Normalmente tur persona (3 – 24 aña) den bijstand y cu ta bay un scol regular durante dia, ta ricibi un ‘toelage’ mensual di AWG 250,-. Despues di e pago di luna di augustus 2020, e sistema di bijstand automaticamente ta kita e ‘toelage’ aki. Consecuentemente, e bijstand pa luna di september 2020 lo baha automaticamente y no lo haya esaki cu forsa retroactivo bek. P’esey ta importante pa cumpli cu e formulario di scol prome cu 25 di september 2020 pa asina e bijstand por wordo ahusta bek pa luna di october 2020.

Si acaso tin un miembro di famia cu no ta bayendo scol y ta riba 18 aña, e lo mester cuminsa cumpli cu DPL, pesey nos ta pidi tur miembro di famia cu ta bay scol pa busca, yena y entrega e formulario di scol 2020-2021. Tambe si tin un miembro di famia cu ta den bijstand, cu ta riba 24 aña y cu ta bay un scol regular durante dia, mester busca y entrega  e formulario di scol prome cu 25 di september 2020.

Final

Departamento di Asunto Social ta pidi pa tene bon cuenta cu e rekisitonan, cumpli cu esakinan segun e “schedule di entrega” y no warda te e ultimo dia esta diabierna 25 di september pa trece e ‘schoolverklaring’. Di e forma aki bo ta evita cualkier situacion menos agradabel den luna di oktober 2020.

Si tin pregunta of ta desea di sa mas informacion por tuma contacto cu Departamento di Asunto Social su seccion di bijstand na telefon 528-1110 of ‘like’ nos pagina di Facebook “Departamento di Asunto Social” y keda bon informa.