Mayor no lubida di coregi y displina bo yiu.
E mesun nomber , cara, y faam cu un mucha tin awe, tambe lo e tin mayan cu Dios kier,pesey como mayor, nos mester tene bon cuenta cu nan comportacion,kico nos ta permiti un mucha haci ,ora e ta chiki, pasobra ora e bira grandi, e ta bira dificil pa controla. Un yiu ta e corona di un famia, un yiu ta trece alegria den cas, un yiu ta pone e amor di mayornan un pa otro aumenta.Un yiu ta trece pas y amor, y hopi biaha pa motibo di un yiu, e pareha ta reconcilia, pasobra nan tur dos a reconoce, cuanto falta y dolor nan lo haci e yiu si nan dos mester separa.
Pero tambe un yiu ta nifica responsabilidad, seriedad, y mas cu tur cos ta pa lanta e mucha den e disiplina y amor di Dios. Ta hopi delicado pa neglisha educacion, disiplina y coreccion di un mucha, pasobra mescos cu mata mester di cuido pa e no crece desformal, asina un mucha tambe mester di disiplina y correcion for di chiki pa e crece drechi. Mayornan no por laga coreccion y disiplina den man di maestro y maestra pasobra educacion ta cuminsa na cas, y no na scol.Bon manera y respet ta bini for di cas, y ta un cadena precioso na garganta di un mucha, tur caminda cu e bay.
E mucha su respet y disiplina ta habri porta pe, su humildad ta un bendicion, pa henter su bida, pasobra tur caminda e ta wordo reconoci, y su mayornan ta wordo aprecia, pa semper pa locual nan a haci den su bida. E palabra di Dios ta bisa nos lo siguiente:Bara y reprendemento ta duna sabiduria,ma un yiu laga pa su cuenta, ta pone su mama na berguensa. Coregi bo yiu,y e lo duna bo trankilidad si , e lo haci bo alma contento. Proverbion 29:15-17).
Disiplina bo yiu mientras cu tin speransa ainda, y no desea su morto.( Proverbionan 19:6).
Suta un hacido di bofon, y un simpel lo bira spierto, y coregi un cu tin comprendemento y elo haña conocemento. ( Proverbionan 19:25).
Cuanto mucha no ta cay den man di polis, cuanto mucha no ta sera, cuanto mucha no ta envolvi den accidente di trafico, door cu nan propio mayor ta permiti nan corre auto sin rijbewijs. Cuanto mayor no ta den gasto grandi pa accidente causa door di desobedencia di nan yiu. Hopi hende no ta compende, of no kier comprende, pero ta bira dia pa dia mas dificil pa lanta un yiu sin presencia di Dios, den bo hogar cual automaticamente, lo mester ta presente tambe den bida di bo yiu. Tempo ta difcil y trabahoso,y esey ta rond mundo, e enemigo ta trahando den tur forma riba nos hubentud, pa asina nan futuro tanto social como spiritual wordo daña. Como mayor nos mester acudi serca Dios, pa sabiduria, pa conocemento, pa amor y cariño,pa nos yuinan,pa nos por guia nan riba e bon caminda. Nunca nos por tira e serbete , ora ta trata di nos yiu, no keda sin pordona bo yiu pa satanas no cohe bentaha den su bida.
Instrui e mucha den e caminda cu e mester cana, y hasta ora e bira bieu, e lo no aparta su mes for di dje.( Proverbionan 22:6). Te hasta un mucha ta conoci pa su hechonan, si su conducta ta puro y recto.(Proverbionan 20:11).
Dilanti di Dios tur mayor ta e prome responsabel pa nan yuinan, yuinan ta regalo di Dios, y tur yiu ta un bendicion pa nan mayornan.
Sinceramente, Pastor Marcel Balootje.
