E anuncio haci door di Minister Glenbert Croes / Rocco Tjon cu FASE lo yega su fin, a causa un consternacion. No solamente pa e efecto cu esaki lo tin riba e ciudadanonan, pero riba e economia en general.
A introduci FASE como un compensacion di e pandemia y pa evita cu un grupo grandi di persona ta keda sin ningun entrada. Esaki a alarga basta unda cu tin mas cu 1000 persona ainda den e pot aki, debi cu negoshinan no a habri.
Basa riba acuerdo cu Gobierno a cera cu Hulanda, a pone cu Madre Patria ta pone hopi presion pa baha gastonan. Y segun por a comprende, un di e demandanan di Hulanda ta pa para FASE y Loonsubsidie. Siguramente e prome lo tin consecuencianan devastador.
Te ainda e economia di Aruba no ta lora manera mester ta, apesar cu turistanan ta yegando Aruba. Hopi negoshi, principalmente den area di inversion y construccion no ta canando manera mester ta. Hopi proyecto ta paralisa y ta den corte door di e mal decisionnan y mal maneho di e director actual di DIP cu bao di su maneho tin dos caso andando cu ta Flamingo y Aloe.
Bisto ta cu e director actual Jaime Croes no ta mantene su mes na regla y ley. E Directeur no ta atene su mes na e algemene beginselen van behoorlijk bestuur (HR 27 maart 1987, ECLI:NL:HR:1987:AG5565) cu ta haci cu e ta stanca e economia unda cu ciudadanonan y inversionistanan no por traha nan proyecto y duna trabao pa e economia cuminsa florece.
Alabes ta pone gobierno di Aruba den un mal bista y cu cada caso cu ya caba a keda perdi den corte y cu lo sigui perde den corte door di su mal decisionnan den DIP ta perhudicando Aruba y ta costa Aruba hopi placa unda cu pueblo lo mester bay paga a consecuencia di e mal maneho di Director di DIP.
Ta un realidad cu Aruba no ta den un posicion stabiel , pero cu tipo di ambtenaarnan asina aki enbes di yuda pa drecha Aruba nan ta perhudica Aruba mas y mas. E interes di e ciudadano o comerciante ta wordo poni un banda y ta saca decisionnan cu enbes ta yuda mas bien ta perhudica.
Debi cu ta trata cada peticion den un forma irresponsable ta causa cu actualmente tin varios caso andando den corte di primera instancia cu lo costa Aruba miles y miles di florin mas den e crisis aki. Entre otro Embassy Suites by Hilton Aruba Resort mes ta un di nan cu ta sufri bao di e mal maneho di Jaime Croes cu no solamente ta perhudicando departamento di DIP y gobierno , pero e interes general di ciudadanonan di Aruba y e economia di Aruba.
Tin casonan den Corte pa motibo cu no por sigui cu desaroyo, door di e stagnamento na DIP y asina por sigui menciona hopi aspecto cu tin e economia di Aruba paralisa.
E decision awo di Gobierno, cu lo para FASE tin hopi consecuencia. Menos placa ta bay lora den e economia, ya cu un grupo grandi di persona no tin entrada mas. Banda di esaki, tin hopi trahado cu te ainda ta haya solamente 60% di nan entrada, a pesar di subsidio di salario. Esaki ta principalmente den turismo. Gobierno ta na altura di esaki y no a haci ningun estudio of investigacion si esaki di berdad y si e ta aceptabel na e momentonan aki. Esaki siendo cu e trahadonan ta traha orario normal.
Banda di esaki, sin FASE, sin Loonsubsidie y cu un grupo grandi di trahado cobrando ainda 60% di nan salario, por constata cu prijsnan ta sigui subi. Y no ta papia aki di bebida alcoholico. Tur producto a conoce subida di 1 pa 2 florin den area di alimento. Esaki sin conta prijs di gasolin cu tambe a aumenta. Tur esaki mientras cu e empleado ta keda atras den su entrada. E gap aki ta bay causa un pobreza enorme atrobe bou di e poblacion.
A lo largo henter e situacion aki lo conduci na un crisis social, cu grupo grandi di persona of famia cu lo dicidi di bay Hulanda, unda cu apesar di e situacion reinante lo ta miho cu Aruba, un isla chikito cu poco recurso pa por pusha e economia.
