“Awor bala ta den nos skochi pa asumí nos responsabilidat pa Kòrsou por desaroyá i progresá!”

Partido MAN, e movementu pa alsa nashon Kòrsou, a tuma e deklarashon di 19 di desèmber 2022 di Gobièrnu di Hulanda riba e rapòrt final di e siklo di diálogo tokante efekto di sklabitut Hulandes mashá na serio. 

Pa MAN e deklarashon ofisial di estado Hulandes tabata un momentu masha importante pa evaluá i mira di ki manera esaki por sirbi nos komo un instrumento efektivo, komo un kompas sólido pa hustamente realisá loke ya pa años nos ta luchando p’e esta, desaroyo emansipatorio di Kòrsou i promoshon i fortalesimentu di dignidat humano di e Yu di Kòrsou. 

For di lantamentu di Partido Man riba 6 di febrüari 1971 nos a skibi libertat, desaroyo emansipatorio i dignidat humano haltu den nos bandera. 

Partido MAN ta konvensí ku mester defendé i protehá a todo kosto dignidat di Yu di Kòrsou komo ser humano. Semper MAN a lucha i ta sigui lucha pa e balor haltu akí. Pa logra e bien haltu akí, nos mester duna historia en general i historia di nos nashon en partikular, un lugá prominente den nos bida, den nos komunidat.  Mucha, hóben, adulto, adulto mayo, enfin kada un di nos mester ta asina dotá I konsiente di nifikashon I balor importante di historia, ku esaki ta inspirá nos vigorosamente riba nos kaminda pa konstruí un mihó futuro pa Kòrsou i pa kada un Yu di Kòrsou. 

Esaki a pone ku ya riba djaweps 22 di desèmber último, Konseho di Partido di MAN a bini huntu pa un promé evaluashon di e deklarashon di gobièrnu di Hulanda. Basikamente por konkluí ku finalmente ku Estado Hulandes a rekonosé públikamente ku e tabata aktivamente envolví den sklabitut i komèrsio di hende sklavisá trans Atlántiko i ku e a benefisiá enormemente di e práktika repudiabel akí. Práktika ku Nashonnan Uní ya pa basta aña kaba a denominá komo krímen kontra humanidat. Riba 19 di desèmber 2022 Estado Hulandes a asumí por su puesto su responsabilidat pa e horibel krímen akí.  

Nos a konstatá tambe ku Hulanda no salamente a pidi diskulpa pa e práktika akí, pero ku el a deklará a la bes ku e ta dispuesto pa awor pa dilanti traha huntu ku entre otro Kòrsou pa loke ta trata reparashon di e dañonan i retrasonan ku sklabitut i komèrsio di hende trans Atlántiko a okashoná. Hulanda a trese bon kla dilanti ku e ta dispuesto pa yuda Kòrsou den e esfuersonan ku Kòrsou, riba su propio forsa, ta hasiendo pa desaroyo emansipatorio di Kòrsou. 

A base di e deklarashon di estado hulandes, Partido MAN por konkluí ku nos ta bai drenta awor un etapa nobo pa loke ta trata e esfuersonan ku ya pa tempu nos a bin ta hasi pa libra nos di e impakto negativo di sklabitut trans Atlántiko Hulandes riba desaroyo di Kòrsou. 

Partido MAN a nota bon kla ku Hulanda no ke hasi esaki unilateralmente sino den konsulta ku Kòrsou, dunando un man na Kòrsou. De echo esaki ta nifiká ku den esaki ta nos mes mester tuma e asiento di direkshon. Nos mes na promé lugá mester determiná ki tipo di desaroyo nos ta mira nesesario pa Kòrsou realmente por krese, desaroyá i emanisipá. Desaroyo riba kua tereno spesífiko? Tur dato ya ta riba mesa òf tin sierto área òf sierto aspekto di e desaroyo deseá ku merese investigashon òf mas investigashon? 

Nos antó mester asumí awor responsabilidat den esaki. Nos mester disidí ku kua otro pais, fuera di Hulanda, nos ke traha pa logra desaroyo emansipatorio kontinuo i sólido di nos nashon. 

 Partido MAN ta konvensí ku e etapa nobo akí por nifiká un gran oportunidat pa Kòrsou, basta nos gara e oportunidat nobo akí ku vishon, forsa i determinashon. Basta nos tur uni forsa pa logra e meta komun i di interes vital akí pa nos tur! 

Den kuadro di esaki Partido MAN ta hasi un apelashon serio i sinsero na tur miembro i tur frakshon di Parlamento, pa uni forsa pa pèrkurá pa Parlamento kumpli ku e petishon públiko ku minister-presidente, Gilmar Pisas a hasi na Parlamento pa evaluá e deklarashon di gobièrnu di Hulanda di 19 di desèmber2022, promé ku Gobièrnu di Kòrsou mes tuma posishon. 

Segun minister-presidente Pisas punto di salida pa e evaluashon di Parlamento mester ta, “ … ku e maneho di reparashon ku tin ku sigui awó mester kulminá den un empuhe signifikante pa e emansipashon sosial, edukashonal, ekonómiko i kultural di e yunan di Kòrsou ku ta korespondé ku resolushonnan 

relevante di Nashonnan Uní ku Gobièrnu di Reino tambe a akordá pa su eks-kolonianan. Tur esaki respetando e prinsipionan di outodeterminashon di e pueblo di Kòrsou komo partner igual den Reino Hulandes.” 

Partido MAN ta uni su mes na e punto di salida aki! Den e mésun rosea MAN ta urgi Parlamento komo representashon demokrátiko di pueblo di Kòrsou pa asumi su responsabilidat i yega, mas pronto posibel na un posishon unitario. 

• Despues ku Plataforma Sklabitut i Herensha di Sklabitut riba dia 1 di yüli 2021 a entregá e rapòrt final “Nos no ke nada otro sino nos libertat,” ku resultado di e siklo di diálogo organisá na Kòrsou, 
• despues ku riba 1 di yüli 2022 Plataforma Sklabitut i Herensha di Sklabitut a tene un presentashon i un interkambio di informashon ku Komishon Sentral di Parlamento, 
• despues ku miembronan di Parlamento riba 5 di yüli 2022 a hasi petishon ofisial pa un reunion públiko di Parlamento riba e tema akí, kaminda a pidi minister-presidente Gilmar Pisas i minister di Enseñansa Siensia Kultura i Deporte Sithree van Heydoorn pa ta presente

• despues ku e delegashon di Kòrsou a trata e tema akí ampliamente den e reunion di IPKO di sèptember 2022 na Hulanda 
• i awor despues di e petishon di minister-presidente Pisas di 19 di desèmber 2022 na Parlamento pa yega na un posishon, 

Partido MAN ta hasi un apelashon serio i sinsero na Parlamento pa bini huntu den e reunion públiko ya pidí for di 5 di yüli 2022, pa fiha un posishon unitario na interes di desaroyo di Kòrsou. 

Partido MAN ta urgi Parlamento pa e reunion públiko akí tuma lugá bon prepará promé ku e próksimo reunion di IPKO ku lo tuma lugá den luna di febrüari 2023 aki na Kòrsou.