Ocho kandidato a finalisá e estudio spesialisá di Mediashon den kasonan Penal. Banda di esaki, riba 27 di sèptèmber tabatin un Masterclass tokante di Mediashon den kasonan Penal i Hustisia Restorativo na kua 26 persona ku ta traha den e kadena hudisial a partisipá. Ku finalisashon di e estudio i e masterclass, ta kuminsá un fase piloto kaminda Boneiru ta bai investigá di ki manera derechi penal por bira mas restorativo. E periodo piloto ta te ku 1 di yüni 2023 i ta un inisiativa di Stichting Reclassering Caribisch Nederland (SRCN).
E mediadónan ku a terminá nan training mes por bai guia mediashonnan den derechi penal. Ku esaki tantu e sospechoso komo e víktimanan por papia ku otro bou di guia profeshonal tokante lokual a pasa i kiko mester pa por koregí òf restorá (en parti) esaki. Ministerio Públiko i Korte lo hasi uso di e resultado (konklushon) di esaki pa despacho di esaki. Partisipashon semper ta boluntario, pues solamente si e víktima i e sospechoso ta di akuerdo i ke esaki.
E mediadónan tambe por guia un enkuentro banda di derechi penal. Esaki yama mediashon restorativo. Por usa mediashon restorativo ora partidonan promé òf despues ku un kaso penal finalisá, tin nesesidat di un konfrontashon, pa motibu ku esaki ta yuda nan ku e rekuperashon emoshonal. Esaki por ta por ehèmpel di un kaso ku no a wòrdu tumá den tratamentu dor di hustisia òf a tuma desishon pa no hasi un denunsia. Mediashon restorativo por tuma lugá tambe despues ku e sospechoso keda kondená i ta riba un base boluntario. Mediashon restorativo no tin influensia riba e proseso penal pa motibu ku e ta o prevení esaki o e proseso penal a terminá.
Mediashon den kasonan penal i Mediashon restorativo ta komplementá e posibilidat di Restorative Justice/practice (Hustisia/práktika restorativo) lokual na Boneiru ta eksistí kaba los for di derechi penal. Ku esaki den kada fase, kier men tantu promé òf despues di kaso penal tin posibilidatnan pa personanan envolví den krímennan pa drenta den kontakto ku otro pa pensa i papia loke ta nesesario den futuro pa rekuperashon.
Hopi partisipante di entre otro SRCN, OM, ZM, KPCN, Akseso, Slachtofferhulp, Voogdijraad, Mental Health Care (MHC) i JICN ta na altura di e tipo aki di hustisia restorativo.
E masterclassnan i e estudio a wòrdu duná dor di sra. Rebecca Leeuwenberg i Sra. Kim Roelofs, ámbos di Amsterdam. Nan ta registrá den e registro di kalidat di Federashon di Mediashon Hulanda (MfN) i banda di esaki nan ta dosentenan kualifiká registrá na CRKBO (Centraal Register Kort Beroepsonderwijs). Mr. Guillano Schoop, Fiskal Mayó suplente di Ministerio Públiko Carib tabata envolví ku e estudio.