Tin un dicho na Spaño cu ta bisa di “Guatemala pa Guatepeor”. Esaki ta loke cu por scucha for di pashentnan awendia papia di nan dokter di cas. E pregunta ta: E dokter di cas ta responsabel pa e servicio cu a bay atras den algun aspecto, of ta e maneho ta causa esaki. Tin algun dia caba tin varios keho ta drentando na nos mesa di redaccion. Mi ta paga mi AZV pa un dokter wak mi y cu mi por papia cu ne mi asuntonan personal, asina un ciudadano basta rabia a cuminsa conta.
Ta berdad cu Aruba a conoce un avance enorme den salud publico. Hospital ta haciendo un cantidad di intervencion cu antes mester a biaha pa exterior pa realisa esaki, entre otro operacionnan hopi peligroso. Tur esaki ta posibel cu cooperacion di instancianan di cuido na Hulanda. Algo cu sigur por ta orguyoso di dje.
Pero ta sinti cu no a duna a mesun debido atencion na otro aspectonan den cuido. Manera e tardansa pa haya cita cu, particularmente, un specialista. Te ainda e ta manera un calvario. Aunke cu tin avance den e operacionnan di catarata, p.e., tin pashent cu tin dos aña sperando e yamada pa nan operacion. Mientrastanto biba cu e sombra den bista of cu no por wak bon, tin su efectonan riba e calidad di bida di cada un di e personanan aki.
E problema no ta sinta den e area ey so. Un di e problemanan grandi ta e desesperacion pa yega of haya atencion for di e cuido di prome linea, esta e dokter di cas. Nan ta practicamente e brake di henter e sistema.
Ta increibel cu ta bay un dokter, aunke cu awendia no por bay mas, pero mester yama pa un cita y ta solamente entre cierto orario. Si no haya nan den e orario ey pero despues, e contesta ta purba mañan atrobe. “Juffrouw por a duna un cita e ora pa mañan mainta e ora?” E contesta ta: No. Bo tin cu yama mañan mainta bek. Y si bo kier papia cu bo dokter, esaki no ta posibel mas. Bo tin cu sinta conta bo asunto priva na un asistente. Algo cu hopi pashent no ta gusta pa otro sa cual ta su problemanan di salud.
E siguiente mainta cu bo yama ta otro problema. Pa cuminsa ta duna bo un cita cu bo mester sali di cas sin bo baña mes, dependiendo unda bo ta biba. Ni tribi di bisa e asistente cu bo tin un dolor di cabes cu ta casi mata bo y tambe dolor den lomba cu ta bay te den bo pia. “Cual ta mas urgente, pasobra dokter por atende pa un cos so. Bo mester haci un otro cita”. Y no por bisa cu esaki no ta berdad, cualkier pashent por confirma di a yega di pasa den e situacion aki.
Hendenan ta muri aki na Aruba pa motibo di malesanan cu ta wordo detecta laat. Of ta cana cu lesionnan rond pasobra no ta haci nada. Tin un ciudadano a conta con den luna di januari, el a cay corta su dede malamente, cu a wordo cosi. Di e tempo ey e pashent a keda cu un brasa hodido. Hopi dolor. A bay cerca dokter. E prome reaccion tabata, door di caida bo a haya un sla y ta haci dolor. “Mi ta bay duna bo pildo pa dolor.” A bebe un luna largo pildo di dolor y nada pa e dolor bay. A bolbe bay dokter, y a pidie pa haci algo otro y asina a bin haya carta pa bay fisioterapista. A bay tratamento un luna largo y dolor ta bira menos pero e ta e acompañante di tur dia di e pashent. Atrobe a dicidi di bay dokter pa splica cu e situacion no tin mehoracion y si no por laga saca un potret si no tin lesion cu a keda atras di e caida. Finalmente a informa e pashent cu hospital lo bay yam’e pa saca potret.
Increibel un caida y ta duna un tratamento sin sa kico mester trata. Esaki ta Aruba unda cu e ciudadanonan ta paga hopi placa, mescos cu pa tur otro cos, pa por haya un bon seguro medico.
