Nos a bula di un topico pa otro, ora cu varios di nos hendenan conosi y aprecia pa Lady Ruth a
fayece den e ultimo par di simannan trai lomba. Nos a para e otro topiconan, pone nan “on
hold” pa a duna e respet y atencion na e sernan keri cu mester a bay nos dilanti. Awe nos lo
“catch up” bek un crenchi y relata algo di e bunita anochi di e musica jazz, cu a tuma lugar na
Kulture Cafe San Nicolas, pafo bau di un shelo na strea cu biento fresco suplando. Segun Lady
Ruth, ya ta varios anja cu ta dedica e luna di April na e musica jazz cu artistanan invita di afor.
Nos mesun artistanan local tambe ta presenta nan musica jazz, tanto hoben como esnan mas
grandi di edad. E luna di April ta wordo yama e Jazz appreciation month, y aunke ya e ta trai
lomba, ainda nos ta tende e dushi musica jazz den nos curason, canta pa e tres cantantenan di
jazz e anochi ey. Nan ta : Tabitha, Watra y Osdaylis , kendenan a canta masha masha bunita
mes. Cada un cu nan stem y bos diferente den nan melodianan sensual y letranan musical
super nice. Un publico hopi grandi mes, tur stoel ocupa,menos un mesa cu a wordo cumpra dor
di un sponsor local cu no a yega. Podise nan a duna nan empleadonan e oportunidad pa bay,
pero , lamentablemente e bista di e mesa rondo ey cu 11 of ta 10 stoel a keda bashi henter
anochi, mientras cu personanan un tiki grandi di edad por a hasi bon uso di nan. Ta cosnan cu
sa pasa, podise un test pa wak kico ta hasi, sinta warda riba hendenan cu nunca a yega. Esta
pret ! Varios di esnan den publico, cu ta custumbra di bay na e anochi aki di Jazz, a bini cu nan
mesun stoel y hasta cu nan mesun mesa. Por a trese bo mesun coi bebe tambe den bo ice jug
of cumpra na e barnan set up pafor riba e caminda y pleinchi dilanti of na banda di Kulture Cafe.
Tawatatin un tent cu tawata bende dushi hapjes tambe. Lady Ruth tawata hopi contento di a
topa cu un di su amigonan colega studiante di Mon Plaisir College di anjanan setenta ney, 69-
70 plus. Nos a topa otro den pauze, ora Freddie tawata buscando Sidney Gunsam.
Freddie Franken ta e mucha homber di nos bario Dakota, y den Mavo cu a yama Ruthy “Kima
schrift” ora Ruthy a bay purba spiek den un proefwerk di spanjo den klas di meneer Archie de
Veer. Ta hopi cos leuk a pasa na Mon Plaisir College, hopi bunita recuerdo, nos a menciona
esaki den un di e One woman shownan di Lady Ruth. Freddie Franken a bira un di e mihor
tocadornan di guitara electrico na Merca unda e ta biba ya pa anjas cu su bunita famia. E
tawata un di e artistanan musico invita pe anochi aki di jazz den curason di San Nicolas y a
duna un magnifico presentacion profesional cu curazon. Lady Ruth a hasi uso di e oportunidad
di Freddie su presencia riba su isla natal, y a regale mi buki di Alegria di Ruthy Poema 2 . Cu
Poemanan na papiamento, ingles, spanjo y tambe na hulandes. E nomber di Sidney Gunsam a
wordo menciona, den nos combersacion e anochi ey, kende tambe ta un tremendo bon musico.
Y Sidney tambe a bai Mon Plaisir College. Lady Ruth y amiga Verna Beaujon a sinta disfruta di
e anochi bunita aki, Verna a hasta los e heupnan un crenchi riba e dushi ritmo y melodia di jazz.
Contento di a topa y combersa un crenchi cu e gran artista Mo Mohamed y un di su yiunan
Mushushu. Contento tambe di por a topa cu mas amigonan di Dakota tur dia, Karel Slikker y
Eric Bubu y su bunita sra.esposa Ruby Lake. Mas caranan conosi : Angel y su eterno amor
Lady Liesje Osorio. Pabien na Vibration PR y demas den e commision organisador, cu un
tremendo bon trabao sigur ! Danki y pabien na tur musico cu a participa den e programa na
Kulture Cafe, y danki na tur e sponsernan cu a hasi esaki posibel. “ Un “bearhug” pa boso tur !!!
Saludos !!
