Dia 3 di maart ultimo den oranan tempran di mainta tres amigo Reangelo Eduardo Stamper, Franklin Vos y Robert Laveist a subi un boto rumbo pa Colombia busca nan Amigo Pau Rasmijn cu tabatin 4 dia perdi.
Awe nan ta bolbe Aruba, sin nan amigo, y despues di a pasa practicamente 4 luna deteni na Venezuela.
Nan amigo Pau Rasmijn a bay sambuya y no a subi ariba nunca mas. Buskeda no a duna resultado. Pero 4 dia despues nan a haya informacion cu a haya un persona of un curpa na costa di Colombia, un area cu yama Las Castilletes. Mesora nan a subi boto pa busca nan amigo. Pero na yegada a resulta cu no a yega na e costa Colombiano pero na e parti Venezolano. Y manera tur hende sa, e frontera di Venezuela cu Aruba ta cera.
Despues di nan detencion a transporta nan pa Maracaibo unda nan a keda deteni te cu awe. A haci hopi intento pa trece nan Aruba pero e tabata hopi dificil. Hopi placa famia a manda pa Abogado y pa nan haya cuminda y paña, cu nan por uza nan celular. Un biaha caba nan tabata na punto pa haya permiso pa bolbe Aruba. Pero door di Covid-19. A sigui haci intento te ora cu awe a haya informacion cu nan a haya permiso pa bandona Venezuela.
Pa mas o menos 7’or di anochi e grupo tabata den awa teritorial di Aruba caba pero parce a haya un problema cu e boto pa cual no a logra drenta prome cu solo Sali.
Pues awe nochi nan ta drumi bek riba nan cama.