Ayera den oranan di mainta minister Glenbert Croes a haya bishita na su cas y na unda a keda deteni. E mandatario a ser hiba Mariniers kazerne y despues e keda transporta pa LR unda cu a keda interoga algun ora. Awe den oranan di mainta e casa di ex minister Glenbert Croes a keda interoga na LR pa asina e investigacion sigui e caminda cu e mester sigui. Abogado Vito Carlo y Abogado Demis Illies ta esunnan cu ta abogado oficial di e sospechosonan aki den caso Portulaca .
E interogacion a tuma luga di mainta y ya caba ta cla. Mester pone enfasis si cu e casa di ex minister Glenbert Croes no ta cera. E ta na cas, pero manera e proceso normal tambe a keda interoga. Asina poco poco e investigacion ta sigui su pasonan, mas lihe e preguntanan keda contesta mas lihe e proceso por cana. Sinembargo pa straño cu e ta mustra y zona, na momento cu ex minister Marisol Tromp cu a keda baha como minister, e tabata sospechoso pa 2 aña largo, pero no a ser busca y deteni riba tur e cargonan cu e tabata sospechoso di dje. Tampoco a traha riba e kehonan oficial cu ex minister Benny Sevinger a entrega na ministerio publico pa investiga ex minister Marisol Tromp.
Si mester mira bon den e mes un liña como sospechoso nan a trata Paul Croes, Benny Sevinger, Otmar Oduber y Glenbert Croes como ministernan diferente, pero e mindset cu a traha e maneho y proceso di corupcion mes cu ta Marisol Tromp a keda trata diferente?, dicon?, ta e pregunta cu awo por scucha bek bou di pueblo.
Algun di e expresionnan cu a scucha tabata si esaki tabata pasobra “acaso e lo a bende su alma cu Hulanda na momento cu e tabata biaha na reunionnan importante representando Aruba y e tabata sospechoso? Acaso e buscuchi mas dushi lo keda pa ultimo? Kico esaki por bisa di un politico cu tabata sospechoso y ta sconde cu e tabata sospechoso pa e pueblo di Aruba?” Dicon no a informa prensa cu un Press Release riba e caso na momento cu Marisol Tromp tabata sospechoso. Ainda por informa pueblo riba e caso unda Marisol Tromp tabata sospechoso principal di e caso di investigashon den DIP ? Ta preguntanan di ciudadanonan preocupa cu ta desea di haya un contesta, pero cu ta den man di autoridadnan local pa splica pakico actuacion diferente.