Minister su maneho di nombracion no ta na beneficio di husticia
Minister Bikker no ta compronde cu hendenan cu ta bini na remarca pa asta solicita riba e funcion di altocomisario cu tin un educacion adecuado, cu ta integro, cu e experencia y e voluntad pa sirbi nos pais den e tipo di posicion aki ta masha limita na Aruba. Na luga di cuida e hendenan aki y scohe nan segun un procedura transparente cu lo mester proteha nan den futuro di cualquier cu kier cuestiona nan den nan trabou, minister ta tuma un desicion cu ta hasi nan innecesariamente vulnerabel.
Ministerio di Husticia di un pais mester wordo caracterisa como un ministerio cu ta mantene su mes y otronan na tur ley y procedura. Siman pasa a bira conoci cu minister a nombra un korpschef nobo den persona di señora Vanessa Tjon-Kock.
E nombracion aki mescos cu tur otro den e tipo di funcion di alto funcionarionan den husticia mester bay segun procedura corecto, mirando cu e personanan aki mester carga nos departamentonan hudicial inrespecto cua gobierno ta na mando y ken ta minister of parlamentario.
E funcionarionan aki tin cu carga responsabilidad grandi y desicionnan difisil cu por tin consequencia grandi den nos comunidad. Pues pa scohe y nombra un alto comisario, mester tuma tur medida nesesario pa e desicion final wordo carga door di tur. Nos ta lamenta cu atrobe minister no a hasi esaki.
Tempo minister Bikker a nombra e penultimo korpschef, ela opta pa no tuma nos sugerencia y tambe di DRH pa e altocomisario nobo wordo “ingewerkt” door di e korpschef saliente. E tempo ey a tarda pa yega na un altocomisario nobo. Awo nos ta mira e otro extremo, pasobra esun cu minister a tuma tanto tempo pa nombra, Bikker mes a disidi rapidamente pa kit’e bek y laga e posicion vacante. E tempo ey a kita Hoo di e functie sin pensa kiko lo pasa cune y con lo remplas’e.
Tres aña, tres altocomisario
Ta remarcabel cu den tres anja cu e Minister di Husticia ta na mando, ya nos ta bay pa e di 3 altocomisario den apenas tres aña cu Andin Bikker ta ocupa e funcion. Esaki no ta un record pa ta orguyoso riba dje. E prome tabata Dolfi Richardson cu awo ta hefe di NCTVI. Despues a nombra Andrew Hoo cu awo ta wordo encarga cu un tarea nobo cu nos no por compronde e logica tras di e funcion nobo aki. Por ultimo ta nombra Vanessa Tjon-Kock pa encabesa e Cuerpo Policial.
Mester evalua gasto nobo den tempo di crisis
Mientras hopi empleado publico ta preocupa si tin placa pa paga nan salario fin di e siguiente luna, minister Bikker ta sigui nombra hende y move hende cu sueldonan di mas halto den gobierno. Ta conoci cu for di algun luna caba cu Gobierno a reduci salario di empleadonan publico debi na e crisis financiero cu e pandemia a trece cu ne. Den gangnan ta tende cu Hulanda lo kier corta mas ainda den e aparato gubernamental.
Minister Bikker ta pasa Andrew Hoo di altocomisario pa security guard.
Minister Bikker no a stop aki cu e nombracion, pero ela sigui pa encarga señor Hoo cu e tarea di security guard di RDA, na un refineria cu ta sera. “Un altocomisario studia na Hulanda y na Merca ganando e salario maximo den gobierno pa bay cuida algun tanki bashi riba tereno di refineria ta prudente?”, ta locual Robert Candelaria ta puntra su mes. Ki sentido tin pa lanta henter un departamento nobo pa cuida un refeneria cu no ta operacional? Den pasado ta companianan priva di siguridad a cuida e refineria, pues no ta mira e necesidad pa haci e cambio di luho aki awo.
Minister Bikker ta laga nos cara na berguensa dilanti Hulanda
Ora cu Parlamentarionan di Hulanda, Secretario di Estado of te hasta Ministernan bisa cu Aruba no por su so, ta riba e tipo decisionnan asina nan ta referi. Gobernantenan ta rabia mesora y bringa cu Hulanda defendiendo nos “autonomia” cu nan mes ta laga bay cada biaha cu tuma e tipo di decisionnan asina. Con nos ta negoshando cu Hulanda pa placa tur luna y nos mes maneho di nos empleado di e top di nos husticia no ta cana bon y ta sigui aumenta gasto. Ta inmoral cu di un grupo bo ta reduci salario y di otro banda ta keda aumenta gasto laboral cu un maneho di nombracion y schuif hende sin vision!