Eleccion tabata plani’a pa juni otro aña. Pero ela wordo yama hopi mas lihe cu hopi hende a kere. Pesey tur partido tin cu accelera nan preparacion pa un campaña hopi cortico. Ta apenas 73 dia falta pa eleccion! Unda cu Bo check y unda cu Bo wak riba caya, ta masha poko actividad di partidonan politico Bo ta wak. Tin masha tiki visibilidad – sticker of bandera- di partidonan politico riba caya. Masha poko actividad di partidonan cu ta mustra cu nan lo ta prepara pa e campaña y eleccion. Cu un excepcion: partido AVP! Cu un serie di actividad bunita y di calidad, partido AVP a bolbe mustra cu bou di tur situacion e partido ta cla pa bay den accion cu ideanan nobo pa retonan di nos pais; cu solucionnan pa problemanan cu por parse dificil pa soluciona. Y cu candidatonan hoben profesional y nobo, cla pa tuma e responsabilidad di nos pais for di e generacion cu a lanta nas pais den e periodo di 2009 pa 2017. E capacidad di shift den accion asina lihe y responde na retonan di nos pais asina fuerte, ta significa cu e partido tin den su seno un capacidad intelectual y un fuente di hobennan capacita y cu deseo pa sirbi, pa asina renoba e partido y sirbi nos pais.
TA PREPARA
Ta prepara ta un caracteristica conoci di partido AVP. Algo cu ela demostra bez traz bez den pasado. E aña aki, e sentido politico di sa kico ta biba den Pueblo a haci cu AVP ya a cuminsa studia y publica riba e tema principal den nos pais: e costo di bida di mas cu mitar di nos pueblo. AVP y en particular nan lider Mike Eman a reuni cu hende rond di Aruba y cu organisacionnan, a studia raportnan, a mustra den y pafor di parlamento riba e dolor inmenso cu mas cu 50% di Pueblo no tin suficiente entrada pa cubri nan gastonan basico. E posicion cla di partido AVP a hiba na e “10 PUNTONAN” central di un gobernacion nobo di AVP. Ya for di comienso di aña nan ta reuni y papia didje. Dia prome di September, un siman prome cu gobierno a cay, AVP tabata tin un Concierto di Gospel cu a hala masha hopi hende. E concierto a culmina den e celebracion di e cumplimento di aña di e lider Mike Eman cu masha hopi hende. Dia cu gobierno a cay Cas di Partido tabata rand rand di hende y activista cu spontaniamente a presenta pa cuminsa cu campaña. Conciente di e reglanan di eleccion e candidato Stephany Sevinger a bula bin Aruba pa inscribi na Censo pa por participa como hoben profesional riba lista di AVP. Siman pasa un di e fundacionnan di partido AVP, ‘FUNDACION MITO CROES’, a tene un seminario cu a wordo masha bon atendi. Pariba un anochi den siman y un tema importante pa Aruba, pero sumamente complica, Bo yena un sala full, ta bisa cu Pueblo tin sed pa informacion serio riba oportunidadnan pa saca nos pais padilanti. Mientras tur esaki ta sosode e partido ta sigui yuda tur hende cu yega Cas di Partido cu nan papelnan di belasting. E programa di radio y facebook di partido AVP di diasabra mainta 9’or, tin un sintonia fiho, pero awor a cuminsa subi mas. Algun candidato riba lista di partido AVP, manera Wendrick Cicilia, Chris James, Otami Thomasia, Junior Croes y Arthur Dowers apenas a cuminsa nan campaña y ta haya hopi mas hende cu usual. Tur e cosnan aki ta señalnan di animo y gana di cambia rumbo di nos pais. Of “bolter cos” manera nan ta bis’e den seno di AVP.
COMIENSO
Tur consehero di eleccion lo bisa cu ta importante pa start e campaña bon: un bon tono, optimismo, hende nobo, plannan bon pensa, etc. E unico partido cu a demostra esey ta partido AVP. Ta hopi cos lo sosode prome cu eleccion. Pero e start fuerte di partido AVP ta un señal cu e partido si ta prepara pa eleccion y pa cambia rumbo di nos pais pa “sirbi tur hende y no un grupito so” (friends and family) manera nan ta bisa.
comunicado
