Awe mainta drs. Mervin Wyatt-Ras y Parlamentario Robert Candelaria a presenta e relato “COVID-19 DEN PERSPECTIVA” den reunion cu dr. Van Gaalen di Respaldo. A splica cu e meta di e brainstorming hunto cu expertonan riba COVID-19 y e relato presenta awe mainta ta pa contribui na un miho comprondemento di e pandemia y su consecuencianan pa Aruba.
Dr. Hendrikus Van Gaalen tambe a forma parti di e brainstorm session aki y ta pa e motibo aki miembronan di partido AVP a yega awe cu e rapport pa asina entrega esaki na su persona. Partido AVP a tene un serie di consulta cu expertonan medico, social y di enseñansa, pa haya tende di nan con nan a atende cu e situacion cu e enfermedad contagioso aki a crea pa nos bida diario, kico ta e daño cu ela causa, dicon cosnan a bay manera nan a bay for di nan perspectiva y kico mester wordo haci pa nos comunidad ta miho prepara pa crisisnan similar den futuro. E brainstorming aki a tuma luga dia 20 di augustus 2020. Basa riba e informacion cu a wordo presenta door di expertonan, a compila e relato “COVID-19 DEN PERSPECTIVA”.
E participacion di dr. Van Gaalen tabata riba e influencia mental, psikico di Covid-19 caminda a haya un bon colaboracion di su banda, unda a mustra cu aunque e cantidad di hende no ta asina halto pero por spera si cu den futuro e lo tin su efecto. Pa locual ta trata e relato mes, a trata e diferente consecuencianan cu Covid-19 a trece no solamente riba e cuido medico unda cu tin un presion hopi halto riba dokter, specialista y enfermeronan como tambe un pression riba e trabou cu Departamento di Salud ( DVG ) ta efectua.
Nos pais y henter mundo ainda ta den e crisis di salud y ta mira efecto di consecuencianan multiple cu e COVID-19 ta bin cun’e. Ainda mundo y nos ta siñando di e daño enorme cu e crisis aki ta ocasiona pa e forma di organisa nos trabou, nos enseñansa, nos cuido medico y nos bida social manera nos tabata conoce. Mientras cu nos ta sigui e crisis aki di serca y siña di tur lsu efectonan riba sociedadnan, nos mester fiha atencion riba manehoun crisis asina pa limita e daño cu e por causa y con nos ta organisa nos bida den futuro bou circunstancianan similar di contagio y riesgo di perdida di bida humano.
E raport aki ta disponible riba www.avp.aw. E comision organisado di e encuentronan cu expertonan ta mr. Mike Eman, drs. Mervin Wyatt Ras, mr. Gerlien Croes, Robert Candelaria y drs. Rene Herdé. E comision organisado tabata asesora pa conseheronan drs. Anco ringeling y mr. Nicole Hoevertsz
