Fraccion di AVP no a bira lomba pa trahadonan of pa pueblo dor di no sostene presupuesto supletorio 2020 pero loke si AVP ta para pe, ta honestidad y respet pa un pueblo cu a bin ta pasando den situacionnan dificil pa ocho luna caba.
Prome Minister Evelyn Wever Croes y henter su gabinete a trata di crea un scenario creando un situacion cu nan mes no ta kere aden pero na final di cuenta, ta trahadonan ta esunnan cu ta perde trabou, cu tin cu entrega gran parti di nan salario y beneficionan.
Di otro banda y pa sorpresa di fraccion di AVP, gobierno a dicidi di reduci gastonan di gobierno den tur forma posibel, caminda ya caba a reduci salario di trahadonan publico, a corta den vakantieuitkereing, den pago di bonus y otro beneficionan pa di e forma aki crea e impresion cu tur hende ta entrega den e tempo dificil aki.
Sinembargo awor ta bin resulta segun a sali na cla den e presupuesto supletorio 2020, cu gobierno a dicidi di reduci salario di consultant- y consheronan cu 10% pero pa loke ta trata asina yama ‘dienstverlening en advocaatkosten,’ e reduccion aki no ta “van toepassing.”
Fraccion di AVP a dirigi e pregunta na gobierno pa loke ta e asunto aki y por escrito a haya confirmacion cu gasto di oficina di abogado, esta pago na oficina di e famoso bufete di Papa, lo no conoce ningun reduccion di pago pa servicionan duna y pa futuro.
Tur hende den servicio di gobierno, dokternan, specialistanan, polisnan, douaneronan, bomberonan y tur pero tur otro departamento di gobierno, a conoce reduccion salarial pero esaki lo no conta pa oficina di abogado cu ta presta servicio na gobierno y den e caso aki tur hende conoce cual ta e compania cu Prome Minister mes a dicicdi di contrata manera den e caso di e contract cu CITGO, esta e bufete di Papa cu Evelyn ta hereda.
Esaki ta algo inhusto, algo incorecto caminda esaki ta ehempel grandi di loke gobierno di MEP semper a promove, esta ‘friends and family’ prome cu pueblo caminda placa tin pa amigo y famia, sponsornan y sostenedonan di partido pero ta e clase trahado tin cu carga e peso grandi aki di reduccion salarial pa baha gasto di personal.
Fraccion di AVP no a sostene e presupuesto supletorio 202 pa motibo di e tipo di abusonan aki, caminda gobierno no ta sincero ni transparente cu pueblo y ta sigui insisti pa cumpli cu famia prome cu pueblo.
