WILLEMSTAD – Den un enkuentro virtual ku Minister di Relashonnan Internashonal di Sürnam, Drs. Albert Ramdin, nos Minister di Desaroyo Ekonómiko, Steven Martina, a duna inisio e siman akí na kombersashonnan pa ofisialmente yega na un akuerdo komersial i un akuerdo di koperashon ku Sürnam.
Intenshon di e deliberashonnan akí ta, pa Kòrsou yega na un akuerdo komersial ku Sürnam i tambe un Memorandum of Understanding (MOU) basá riba koperashon “Sur Sur”. “Sur Sur” ta para pa dos pais den desaroyo i ta pues un denominashon internashonal ora ta trata di un koperashon entre dos pais den desaroyo (hemisfero sùit).
E enkuentro virtual akí a konta tambe ku presensia di Presidente di e Komishon Permanente di Gobièrnu di Kòrsou enkargá ku komèrsio internashonal i relashonnan ekonómiko ku eksterior, mr. Drs. Caryl Monte i funshonarionan di tantu MEO komo CTB.
Sürnam ta un aliado komersial, sosial i kultural sumamente importante pa Kòrsou. Entre Kòrsou i Sürnam ta eksistí lasonan sólido pa ya pa diferente aña kaba ku ta balioso pa nos reforsá. Den e kuadro akí, e mandatarionan di Kòrsou i Sürnam a papia durante e kombersashon virtual akí kon por hasi e lasonan entre e dos paisnan aun mas estrecho. Esaki dor di formalisá algun akshon konkreto pa empoderá otro i sostené otro den rekonstrukshon di e ekonomianan di ámbos pais.
Pa algun tempu kaba, MEO a bin ta organisá diferente bishita komersial pa Sürnam ku e meta pa huntu traha riba akshonnan konkreto pa stimulá mas komèrsio entre Kòrsou i Sürnam i komèrsio via Kòrsou pa sobrá di region; tantu riba tereno empresarial komo tambe gobernashon.
Sürnam, komo miembro di Caricom, tin akseso liber pa e merkadonan akí, pero su posishon geográfiko ta pone ku e no ta serka di e merkadonan konserní. Kòrsou di otro banda, ta serka di e merkadonan pero no ta miembro di Caricom. Einan, dor di formalisá un akuerdo komersial, nos por realisá aktividatnan komersial, ko-produkshon i tambe kadena di balor ku por keda kreá i asina logra stimulá un komèrsio ku tin potensial pa krese.
E dos mandatarionan pronto lo firma un karta di intenshon ku ta stipulá e ‘roadmap’ di ki forma ta bai yega na e MOU “Sur Sur” i e akuerdo komersial entre Kòrsou i Sürnam.
