“E relacion entre ministerionan di Aruba y Hulanda ta uno fuerte y ta trece beneficio pa Aruba”. Esaki Prome Minister Evelyn Wever Croes a bisa.
Diahuebs Prome Minister Evelyn Wever-Croes hunto cu Minister di Minister di Transporte,vComunicacion y Sector Primario, Chris Romero, a haya bishita di ‘Minister van Infrastructuur en Waterstaat’ Hulandes, Cora van Nieuwenhuizen. A pesar cu ambos gobierno ta demisionario, e relacion entre e ministerionan ta crucial. Un bon relacion ta duna mas cooperacion. Y esey ta loke cu nos mester pa recupera despues di e efectonan cu Covid 19 a laga atras.
Minister Cora van Nieuwenhuizen ta pasando diferente isla den Caribe y a bishita Aruba tambe. Prome Minister a expresa si cu door di e biaha cortico di señora Nieuwenhuizen, e encuentro tawata uno hopi cortico sinembargo hopi informacion a wordo intercambia.
Minister van Nieuwenhuizen a reuni si extensamente cu Minister Chris Romero riba tereno di transporte y mester menciona cu e relacionnan entre e ministerio aki y e ministerio na Aruba ta bon y mester sigui estrecha laso.
“Den nomber di gobierno di Aruba mi a gradici Minister van Nieuwenhuizen pa su bishita.
Apesar cu nan y nos ta demisionario, e importante ta cu e ministerionan mester ta bon cu otro pasobra ta asina so nos ta saca beneficionan pa Aruba. E bon ta cu e caso aki nan ta cu aunke e minister por cambia, e relacion ta uno fuerte cual ta trece beneficio pa Aruba”.
