24 di februari 2022 Gobernador suplente di Aruba, Su Excelencia Agustin
Vrolijk, a ricibi señor Fernando Antonio Grillo Rubiano, Embahador di Colombia den Reino, pa un audiencia na Cas Ceremonial.
Señor Rubiano riba 7 di April 2021 a presenta su credencialnan na Rey Willem-Alexander. Actualmente e ta realisando un bishita di trabao na Aruba como un introduccion oficial. Durante di e audiencia señor Rubiano a wordo acompaña pa señor Ernst Noorman, Embahador di Reino na Bogota y e Consul di Colombia na Aruba recientemente acredita, señora Mirza Cristina Gnecco Plá.
E temanan cu a trata ta inclui, entre otro, e gran cantidad di refugiado Venezolano na Colombia y e proximo eleccionnan legislativo y presidencial na Colombia. Tambe a papia tocante comercio entre e paisnan y e posibilidad pa studiantenan di Aruba sigui nan estudio na Colombia.
