Aruba Airport Authority N.V., conoci como AUA Airport ta masha orguyoso di anuncia vuelonan adicional pa y for di Aruba. Despues di bastante negosacion, deliberacion y preparacion, Aruba a logra convence Avianca pa amplia nan frecuencia pa Aruba. Den e caso aki, e aerolinea a sigura cuater vuelo semanal for di Medellin pa Aruba, durante e temporada di zomer, esta den lunanan juni, juli y augustus.
Ta trata aki di un vuelo nobo, cu number AV 0113 cu ta cuminsa dia 13 di juni 2023. Manera ta programa awo, e vuelo lo sali riba dianan diamars, diahuebs, diasabra y diadomingo pa 10:35 am for di Medellin y ta yega Oranjestad pa 1:20 pm. Aki na Aruba pasaheronan di Colombia ta baha y esunnan di Aruba ta subi abordo pa e avion lanta vuelo bek pa 2:30 pm y yega Medellin pa 3:30 pm. Pa esaki Avianca lo uza un avion marca Airbus modelo A320 cu ta carga no menos cu 150 pasahero, parti den 12 Business Class seats y 138 Economy Class seats.
E ruta Medellin-Aruba ta “hot”
Ya caba e ruta for di Medellin pa Aruba ta den operacion for di algun tempo caba. Actualmente e unico aerolinea sirbiendo e mercado ta Wingo, cu ta bula cuater biaha pa siman pa y for di Medellin pa Aruba cu su avion marca Boeing modelo 737-800 cu un capacidad di 186 stoel. Wingo ta bula riba dialuna, diamars, diaranson y diasabra durante e lunanan ocupa. Durante lunanan normal nan ta bula dos biaha pa siman, cu ta riba diaranson y diasabra.
Medellin por conecta bo facil
Asina bo yega Medellin for di Aruba, bo tin un variacion amplio di otro destinacionnan cu Avianca por hiba bo den Colombia mes. Pensa riba Barranquilla, Bucaramanga, Bogota, Cali, Cartagena, Cucuta, Monteria, Pereira, Riohacha y Santa Marta.
Pero tambe tin un lista di opcionnan internacional unda tambe Avianca por conecta bo, manera: Cancun (Mexico), Guayaquil (Ecuador), New York (USA), Madrid (Spaña), Orlando (USA), Mexico City (Mexico), Miami (USA), Punta Cana (Republica Dominicana), San Jose (Costa Rica) y Quito (Ecuador).
Mercado Latino Americano
“E mercado di Latino America ta priminti di sigui desaroya y crece den e tempo nos dilanti. Banda di cu e economia di e paisnan ta avansando, tin mas interes tambe pa bishita Aruba. Y na AUA Aiport nos ta percura pa regularmente sondea oportunidadnan nobo pa mas capacidad for di e continente, pero specialmente Colombia”, asina Jo-Anne Meaux-Arends, Aviation Business Development Executive a sigura.
Plannan pa aña 2023
Avianca Group a anuncia cu den aña 2023 nan lo habri 20 ruta nobo. Mas ainda e compania ta planea pa añadi 16 avion nobo, marca Airbus modelo A320neo, mas 11 avion marca Airbus modelo A320 y tres avion grandi marca Boeing modelo 787 Dreamliners. Ta bon pa menciona cu aña pasa Avianca a reconfigura 65 avion Airbus A320 pa por a aumenta nan capacidad di stoel cu 20%. E proceso ey lo keda cla te otro aña.
Den e segmento di carga, e obhetivo principal ta pa logra “business consolidation”, añadi destinacion y subi e frecuencia di operacion den e mercadonan principal. E plan ta pa subi e negoshi di carga cu por lo menos 10% e aña ‘ki.
Den un paso similar cu varios di e companianan “low-cost”, Avianca tambe lo inicia su di dos fase di ofrece servicio “in-flight sales service”, cu apenas a inicia dia 1 di december ultimo. Tambe lo introduci “Avianca On Air”, cu ta un servicio nobo di entretenimiento abordo. Adicionalmente, lo modernisa nan website y optimalisa e proceso di “refund”.
Tocante AUA Airport
AUA Airport ta un di e aeropuertonan mas ocupa den region Caribe cu mas di 24 diferente aerolinea operando pa Aruba contribuyendo na mas cu 2.5 miyon pasahero pa aña (prome cu COVID) y cu buelonan pa 26 diferente destinacion rond di mundo. AUA Airport ta opera stabiel cu mas di 95% di su bishitantenan cu ta bin pa vakantie di cual 77% ta for di Merca y Canada, 10% for di Latino America, 8% for di Europa y 4% for di Antia Hulandes te cu fin di 2022.
AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla. AUA Airport ta sigui expande y mehora su facilidadnan pa mantene su posicion como un di e aeropuertonan mas innovado den region.
Conoce mas di loke ta pasando na AUA Airport dor di bishita www.airportaruba.com y connecta cu AUA airport riba Twitter.com/Aruba_Airport, Facebook.com/ArubaAirport, Instagram.com/arubaairport/ and Linkedin.com/ArubaAirport.
Fecha, 22 di december 2022