ATSA, The Aruba Timeshare Association, a conduci un reunion general recientemente na La Cabana Beach Resort & Casino. E encuentro a wordo atendi por medio di miembronan di e asociacion, tambe presente tabata Dangui Oduber, Minister di Turismo y Salud Publico, Ursell M. Arends, Minister di Integridad, Naturalesa, Transporte y Cuido di Nos Grandinan, y tambe Endy Croes, Minister di Enseñansa y Deporte.
E mandatarionan a bini e reunion aki pa informa miembronan di ATSA riba desaroyonan recien den cuadro cu un variedad di asuntonan importante. E Minister di Turismo y Salud Publico a subraya e isla su strategia di salida for di pandemia, Minister di Integridad, Naturalesa, Transporte y Cuido di Nos Grandinan, bistiendo su pechi di medio ambiente, a raporta desaroyonan tocante RWZI, e facilidad di rehabilitacion di awa sushi na Bubali, y Minister di Enseñansa y Deporte, a discuti e colaboracion entre e resorts y Scol Practico Pa Ofishi, SPO.
Den su discurso, Minister di Turismo y Salud Publico a anuncia un aumento den e capacidad di ICU riba nos isla, e revision di protocols di entrada, strategia pa e comunidad local, flexibilidad introduci cu e acceptacion di Anti Gene Tests, reforsa di nos departamento di salud local y promocion di vacunacion.
Pa locual ta e beleid di Turismo, e mandatario a describi seis areanan central pa enfoca den cuadro cu Aruba Tourism Product Enhancement Fund, TPEF, entre otro: atraccionnan, siguridad, medio ambiente, herencia, conscientisacion y inversion.
Algun di e proyectonan introduci den 2022 ta embeyecemento y desaroyo di Eagle Beach; desaroyo di Aruba su Oranjestad Harbor pa revivi Aruba su depositonan di santo blanco; Malmok Boardwalk Fase 3; Mantencion y embeyecemento di trapinan na Hooiberg; Restoracion di Fort Zoutman; Sustainable Waste Management via TPEF cleaner teams y TPEF su barinan di sushi, fondonan tambe aloca pa Stimami Sterilisami den cuadro cu programa di sterilisacion, spay y neuter di pushi y cacho.
Minister di Enseñansa y Deporte a discuti tambe e esfuersonan haci na SPO pa integra studiantenan den industria laboral, por medio di brinda guia na companianan, no solamente studiantenan. SPO el a splica, ta promove inclusividad y crecemento economico sostenibel, cuponan di trabao pa tur, mehorando asina calidad di bida.
SPO, el a agrega, ta brinda educacion inclusivo na studiantenan cu limitacionnan pa siña, IQs entre 60 pa 80, kende por siña tareanan importante di bida, cu un bon comprendimento di instruccionnan. Si brinda suficiente guia nan lo por wordo motiva, e mandatario ta subraya, pa asina por brinda su dunado di trabao calidad y fidelidad.
E scol ta consisti di studiantenan entre edadnan di 12 y 18, y ora cu nan gradua nan ta cla pa integra den industria laboral, despues di tres aña di training practico.
Minister di Integridad, Naturalesa, Transporte y Cuido pa Nos Grandinan a duna un status update di loke ta RWZI, e facilidad di awa na Bubali, lagando sa cu mirando cu esaki no ta parti di Landspakket, e reformanan sugeri pa Hulanda, Aruba no tin e fondonan disponibel, sin embargo ATA a presenta e finansas pa 2022 y un proposicion ta actualmente den proceso di analisacion na momentonan aki, mirando si lo tin e posibilidad pa construi, posee y opera, como un opcion.
E mandatario a enfatisa cu tin hopi dedicacion na e proyecto, sosteniendo e inversion pa aumenta e capacidad di RWZI, introduci leynan ambiental pa trata cu beleid di desperdicio y crea un United Western Wetland area di proteccion, maneha pa Fundacion Parke Nacional Arikok, FPNA.
ATSA tambe a tuma e oportunidad pa revisa nan resultado di finansas pa 2021, por medio di tesorero Jurgen Schalijk hunto cu un corto update riba e Security Foundation por medio di miembro di hunta, Hotelero, Bob Curtis, y Universidad di Aruba proyecto di research, entre 14 pa 25 di Maart, 2022.
Un ceremonia ameno di despedida pa hotelero retira, presidente anterior di ATSA, Andy Osborne, a conclui e agenda cual a wordo hinca den otro pa Presidente Luigi Heredia y miembro di hunta Sulaika Kelly.
ATSA su 15 miembronan resorts ta comprometi den sigui haci Aruba un di e destinacionnan top den Caribe. Esakinan ta: Amsterdam Manor; Aruba Beach Club Resort; Caribbean Palm Village Resort; Casa Del Mar Beach Resort; Costa Linda Beach Resort; Divi Dutch Village Beach Resort; Divi Aruba Phoenix Beach Resort; Divi Village Golf and Beach Resort; Eagle Aruba Resort & Casino; La Cabana Beach Resort and Casino; La Quinta Beach Resort; Marriott Aruba Ocean Club; Marriot Aruba Surf Club; Paradise Beach Villas; y Playa Linda Beach Resort.
