Diaranson anochi 22 mei central di polis a wordo notifica cu un atraco lo mester a tuma lugar riba dos turista nacionalidad mexicano den e parkeerplaats banda di Dunkin Donuts. E turistanan a declara cu nan a yega na nan auto y dos hende homber mester a atracanan y un di nan tabata tin icepick. Nan lo mester a bay cu un tas conteniendo $250,- aden.
E dia anochi encuestion Atraco Team a presenta y a cuminsa cu e investigacion. Despues di e investigacion a resulta cu na niun momento e turistanan a wordo atraca y tampoco aserca pa dos hende homber.
Cu esaki a resulta cu e turistanan, R.J.G.Q y F.D.P.L.G., a duna un declaracion falso ( valse aangifte)
E tas a wordo recupera y e turistanan mester a presenta na departamento di Atraco Team na unda nan a wordo confronta cu e hecho di a duna un declaracion falso.
Fiscal a impone un multa pa cu esaki , cu e turistanan mester a paga prome cu nan a bandona Aruba.
Departamento di Atraco Team ta traha incansablemente pa asina resolve tur caso.
