Presidente di ATIA Hendrick Heriques a yama un conferencia di prensa como gremio comercial. Segun Sr.Heriques ya caba gremio comercial a vocifera e pensamento riba BBO na frontera, sinembargo ta mira diferente desaroyonan cu ta tumando luga y tambe loke cu parlamentario nan ta vocifera kier a reacciona riba e parti aki.
Segun sr. Hendrick Heriques e ley di BBO na frontera no ta un ley nobo, ta conoci cu na 2020 a presenta e ley aki pero door di COVID a pare. Loke cu ta hopi interesante ta cu ta ricibiendo hopi informacion di parlamentarionan cu e ley ta bon ect ect , pero loke cu ta un realidad ta cu e ley no ta cla y e ley ta na Raad van Advies na e momentonan aki y ainda e mester yega parlamento.
ATIA di su banda a pidi un reunion cu parlamento, pero tambe den pasado minister concerni a bisa ATIA cu lo haya un reunion cu gobierno tambe y lo haya un DRAF di e ley cu ainda ATIA no a ricibi.
ATIA ta preocupa mirando cu tin un ley cu mester bin na vigor dia prome di juni cu ta aki 17 dia cu e ley mester bin na vigor, un ley cu ta bay afecta full Aruba. Presidente di ATIA Hendrick Heriques ta kere ta hopi importante pa trece algun punto di e ley di BBO na frontera. E termino cu ta bay afecta y determina con e ley aki ta wordo poni na vigor ta e termino di handelsgoederen.
E termino handels goederen a haya su cambionan na 2020 y na 2023, pero tambe por a comprende cu e termino a bay bek manera cu e tabata. Kico ta un handelsgoed? Segun Presidente di ATIA Hendrick Heriques handelsgoed ta e producto cu e hende ta importa y bende. Manera cu ATIA ta compronde e deseo tabata pa amplia e ley aki.Un producto cu ta trece Aruba bo ta verwerk y bewerk, dus por traha riba e producto y despues rebende.
E importancia di esaki ta mes un cos cu e BTW ora cu ta importa un producto y rebende bo ta haya credito, pero awo cu e BBO na frontera e ta mane un pre- pago di BBO cu un compania mester bay paga, despues ta haya un credito y paga e restante na momento cu nan bende e producto.
Segun Presidente di ATIA Hendrick Heriques esaki ta e importancia di e handelsgoed. Si e compania no haya un credito pa e producto cu e la importa y a paga 7% di e BBO na frontera tin cu compronde cu e 7% ey ta un subida di e costo di e producto dus e prijs di e producto na momento cu bay rebende e ta bay ta mas halto mirando cu no a haya e credit.
Segun Presidente di ATIA Hendrick Heriques den media por a tuma nota cu ta vocifera cu tur hende ta haya credit, pero manera handelsgoederen con e ta keda interpreta door di expertonan na miembronan di ATIA mester ta bon cla cu e handelsgoed ta hopi specifico awo y no tin claridad kico tur ta bay cay den handeslgoed. Esaki ta un di e puntonan cu ta importante pa e comerciantenan sa kico ta e productonan cu ta cay den e handelsgoed pa asina nan sa si lo importa e productonan si of no.
Un termino cu mester por ta simpel, si bisa cu tur cos cu keda importa ta haya un credit ta limita e handelsgoed. Un ehempel ta cu na momento cu importa e carni na bara y ta wordo corta, si mester corta e carni pa verwerk e carni y traha un producto nobo, eingelijk no por kite, esaki ta conta mes un cos pa galiña tambe. Si mester mira esaki ya caba por imagina con hopi trabao administrativo esaki ta bay bin cu ne pa asina wak unda si y unda no, segun Presidente di ATIA Hendrick Heriques esaki ta tipo di preguntanan cu tin ki ora si y ki ora no. Un splicacion na esaki ta hopi importante debi cu lo e bay afecta prijsnan.
Esaki ta puntonan cu gremionan comercial kier mas claridad riba dje y ta spera cu departamento di impuesto bin cu minister concerni bin padilanti pa trece mas claridad.
1 comment
[…] Source link […]