Pa hopi aña gremionan di sector priva na Aruba a recomenda na gobierno pa reforma impuesto y introduci un sistema indirecto. IMF tambe tin varios aña ta recomenda impuesto indirecto y introduccion di Value Added Tax (VAT), manera un BTW (belasting toegevoerde waarde). Aruba a bay di acuerdo cu reforma di impuesto pa sistema indirecto segun e condicionnan di prestamo di Hulanda conoci como “landspakket”.
Mientras cu gobierno ta preparando pa Aruba introduccion di un BTW den futuro y haciendo nan calculacionnan, no tabatin oportunidad ainda pa sector priva duna recomendacion riba e structura di un BTW pa Aruba.
Aruba Hotel & Tourism Association (AHATA), Aruba Trade & Industry Association (ATIA), y Arubaanse Vereniging van Belastingconsulten (AVVB) a colabora pa crea un lista di recomendacion pa gobierno tene cuenta cu ne durante nan preparacion pa BTW.
E metanan principal pa un BTW ta pa facilita entrada pa gobierno, mientras cu ta haci e sistema mas simpel y no haci consumo mas caro pa e consumidor durante proceso di produccion of benta. Alabes, un sistema di BTW ta yuda cu esunnan cu ta consumi mas ta paga mas. E recomendacionnan ta inclui cu e BTW mester reemplasa varios otro impuesto y wordo introduci den un base amplio. Ta importante tambe pa e introduccion ta parti di un reforma completo cu ta sigura cu e personan cu menos entrada ta keda cu mes poder di compra y no ta perhudica.
Cu e recomendacionnan, e 3 gremionan kier asegura cu e sistema ta simpel, husto y efectivo pa gobierno, comercio, y consumidor