Desde 2016, e hoben talentoso Rasheed Lowe, naci 25 di October 2004, ta un di e prome hobenan for di un grupo grandi di hobennan di su edad cu semper a sa di ta presente na tur Aruba Art Fair pa yuda y siña for di e muralista Internacional cu cada aña ta bishita nos Isla. Fiel y cu un gana grandi pa siña tur dia Rasheed ta presenta y a bira sin duda alguno un di e favorito entre e muralistanan. Na edad hoben di 13 aña e la cuminsa pinta muralnan expresivo semper buscando e detayenan den su obra.
San Nicolas tin mas di un obra di e hoben aki, un di e mas expresivo sigur ta e obra Malcom X y Mohamed Ali.
Alumno prodigo di Muralista Mr. Dheo di Portugal cu ta un muralista aclama Internacionalmente pa su fantastico trabao. Teniendo en cuenta e talento unico di Rasheed, su sed pa supera y mas cu tur cos su manerismo exepcional, cu ArtisA a adopta e hoben. Semper ta wordo encurasha pa sigui desenvolve den su formacion artistico como muralista y como pintor. Semper y cuando cu su estudio ta keda na prome lugar. Ta na 2019 cu Rasheed bao di guia di e muralista Portugues Mr. Dheo cu e la participa pa prome bez den Aruba Art Fair.
Durante temporada di Covid e hoben a concentra riba e mahestria di pinta cu charcoal y cu su potloodnan special for di exterior dunando realse na e mahestria un poco mas aya cu solamente expression di potretnan. Ta aki e hoben talento a pinta entre otro e fayecido Kobe Bryant riba canvass.
Na 2021 e la gradua na Agustinus College den Natuur Wetenschappen. No solamente e ta e King of Graffiti di Aruba pero tambe e ta practica Teakwondo. Y ta akinan ta unda e la conoce Janiro Eisden cu su jui cu ta su teammate Jamani Eisden.
“Mi respet pa Ataniro ta grandi y cu gusto mi ta comemora su 30 aña como artista den un mural cu ta papia di su persona manera cu e ta. Den tur mi obranan e ta respaldami dor di saca un selfie y mustra su aprecio. Pero mas cu esey mi ta convenci cu Aruba tin un hereo di musica cu e talento unico di trese e palabranan di un manera unico y cu e ritmo sin igual cu ta caracterisa su “uniqueness”. Nos yiu di tera.”
ArtisA, organisadornan di Aruba Art Fair ta sera asina cu broche di oro e aña 2022, cu e ultimo mural ATANIRO, E LEYENDA pinta pa Rasheed Lowe.
Y nos ta bisa un Danki special na Aruba Tourism Authority, Prins Bernard Cultuur Fonds Caribisch Gebied, Mondriaan Fonds, AIS y tur otro cu a haci di 2022 algo special. Felicidades den e dianan di Fiesta y un tremendo apertura di 2023, cu lo trece masha hopi sorpresa.
