E plannan di curason ta pertenece na hende,ma e contesta di lenga ta bini di Señor.
Tur caminda di un hende, ta limpi den su mes bista, ma Señor ta pisa e motibonan.
Encomenda bo obranan na Señor y bo plannan lo wordo estableci.( Proverbionan 16:1-3).
Dios a duna tur hende e liber escogencia, bo por scohe pa malo y of bo por scohe pa bon, bo por scohe pa Dios of bo por scohe pa diabel, bo por scohe pa bida eterna den cielo, of bo por scohe pa morto enterno den fierno, bo por scohe pa studia of keda sin studia, bo por scohe pa obedencia, of bo por scohe pa desobedencia,
Pero no lubida cu tur escogencia tin nan consecuencia bon of malo pa bo mes, pa despues bo no bin culpa ningun hende di locual bo a scoge.
Pasobra ta para scirbi: Pasobra Dios a stima mundo asina tanto cu E a duna su Yiu unigenito pa ken cu kere den dj’E no bai perdi ma tin bida eterna. Dios no a manda e Yiu den mundo pa condena e mundo, ma pa e mundo wordo salba door di dj’E. Esun cu kere den dj’E no ta condena, esun cu no ta kere ta condena caba. Esey ta nifica cu e unico manera pa hende por tin bida eterna ta door di kere den nos Señor Hesus Cristo, y den nada otro.
Tur hende mester scohe pa Cristo pasobra esun cu no scohe, pa Cristo ta scohe pa maldad,pasobra no tin caminda neutral, ni tampoco hende no por biba cu Dios y cu diabel pareu.
Awor orguyo, y falta di conocemento,hopi biaha ta pone cu hende no ta scohe pa e caminda di Dios, of e caminda di decensia y moralidad, pero manera ta bisa den boca di pueblo, ami ta dicidi kico mi ta haci ningun hende no tin nada di bisami.
Ami ta dicidi si mi ta bebe alcohol,
Ami ta dicidi si mi ta huma sigaria.
Ami ta dicidi si mi ta droga.
Ami ta dicidi cu ken mi sali.
Ami ta dicidi ki ora mi ta yega.
Ami ta dicidi cu ken mi ta drumi.
Ami ta dicidi si mi ta biba den inmoralidad.
Ami ta dicidi si mi ta usa anticonceptivo of no.
Ami ta dicidi kico mi ta come of bebe.
Ami ta dicidi cu mi ta pone tattoo riba mi curpa.
Ami ta dicidi cu mi ta bay bisti casi sunu den carnaval y balia indecente.
Tur cos ta draai rond di ami.
Pero ta para scirbi: Huy for di inmoralidad, tur otro pica cu hende comete ta pafo di e curpa,ma e hende inmoral ta peca contra su mes curpa.Of boso no sa cu boso curpa ta tempel di Spirito Santo. Kende ta den boso. Kende boso tin di Dios, y cu boso no ta pertenece na boso mes? Pasobra boso a wordo cumpra pa un prijs pesey glorifica Dios den boso curpa.( 1 Corintionan 6:18-20).
Nos tur sa cu den e ultimo dianan temponan trabahoso lo bini,y awor nos tur ta mira con desobendecia na Dios ta aumentando dia pa dia.
Ta dificil pa lanta un famia sin Dios, esey ta locual tur hende mester reconoce, y consulta cu Dios den tur locual nan ta bay haci.
Fornicacion y adulterio ta keda pica, sea bo comete cu proteccion of sin proteccion, y e mihor forma ta pa abstene di tur forma for di inmoralidad.
Laga tur esnan cu ta menciona e nomber di Dios abstene nan mes for di maldad.